Qytaı jyl sońyna deıin 32 mıllıonnan astam avtokólik satýdy josparlap otyr

ASTANA. KAZINFORM — 2025 jyly Qytaı shamamen 32,3 mıllıon avtokólik satýdy josparlap otyr, dep habarlaıdy Kazinform agenttigi Sınhýaǵa silteme jasap. 

Qytaı bıligi avtokólik sektorynyń ósýin turaqtandyrý boıynsha 2 jyldyq jumys josparyn jarııalap, 2025 jyldyń qorytyndysy boıynsha shamamen 32,3 mıllıon avtokólik satý maqsatyn qoıdy. Bul ótken jylmen salystyrǵanda shamamen 3%-ǵa artyq. 

Qujatqa sáıkes, Qytaı Halyq Respýblıkasynyń Ónerkásip jáne aqparattandyrý mınıstrligin qosa alǵanda, 8 memlekettik organ birlesip jarııalaǵan málimetterge súıensek, 2025 jyly jańa energııa kózderine negizdelgen kólikterdiń satylymy shamamen 15,5 mıllıon birlikke jetip, kórsetkishtiń ósýin shamamen 20%-ǵa jetkizedi. 

Bul jyly basqa maqsattarǵa avtomobıl eksportynyń turaqty ósýi men avtomobıl ónerkásibindegi qosylǵan qunnyń 6%-ǵa artýy kiredi. 2026 jylǵa qaraı sala tıimdilik, sapa jáne aýqymdy arttyrýmen turaqty ósimdi saqtaıdy dep kútilip otyr. 

Jospar 4 negizgi salada 60-tan astam is-sharany qamtıdy, onyń ishinde ishki suranysty yntalandyrý, óndiris-ótkizý tizbekterin nyǵaıtý, bıznes klımatyn ońtaılandyrý jáne ashyqtyq pen yntymaqtastyqty tereńdetý. 

Eger suranys týraly aıtsaq, onda NEV naryǵyn keńeıtý jáne ıntellektýaldy qosylǵan kólik quraldaryn alǵa jyljytý boıynsha sharalar josparlanǵan. 

Qujatta 700 myńnan astam qosymsha NEV-diń 25 qalada qoǵamdyq kólik, taksı jáne logıstıka sekildi sektorlarda pılottyq rejımde engiziletini kórsetilgen. 

Eske sala keteıik, buǵan deıin Qytaı jańa iPhone 17 smartfondaryn álemge eksporttaýǵa daıyndalyp jatqanyn jazǵan edik.