Qytaı jer silkinisiniń saldaryn joıýǵa spýtnıkter men drondardy jumyldyrdy
ASTANA. KAZINFORM – Qytaı beısenbi kúni keshke Sıtszan avtonomııalyq aýdanynda bolǵan magnıtýdasy 7 jer silkinisiniń saldaryn joıý jáne qutqarý jumystaryna kómektesý úshin spýtnıktik resýrstar men ushqyshsyz ushý apparattaryn (drondardy) iske qosty. Bul týraly Sınhýa agenttigi jazdy.
Qytaıdyń aeroǵaryshtyq ǵylym jáne tehnologııalar korporatsııasy (CASC) juma kúni tabıǵı apattan keıin shuǵyl baılanys ornatý, aýmaqty túsirý jáne zardap shekken óńirdi baqylaý úshin qajetti spýtnıktik resýrstardy jedel úılestirip, iske qosqanyn málimdedi.
CASC dereginshe, Qytaıdyń Tótenshe jaǵdaılardy basqarý mınıstrligine, Sıtszan avtonomııalyq aýdanynyń tótenshe jaǵdaılar jónindegi basqarmasyna jáne eldiń negizgi baılanys operatorlaryna spýtnıktik ınternet arqyly jumys isteıtin joǵary ótkizý qabileti bar birneshe shuǵyl baılanys jelisi usynyldy. Qalǵan baılanys termınaldary apat aımaǵyna kezeń-kezeńimen jetkizilip jatyr.
Jer silkinisine baılanysty spýtnıktik túsirilim jasaý týraly ótinishterge jaýap retinde CASC birden Gaofen-4 jáne basqa da spýtnıkterdi iske qosyp, zilzala bolǵan aýmaqty baqylaýǵa aldy. Beıjiń ýaqyty boıynsha juma kúni tańǵy saǵat 07:00-ge deıin apatqa deıin túsirilgen tórt jáne odan keıin túsirilgen úsh sýret jedel ázirlenip, qutqarý jumystary men apat saldaryn joıýǵa berildi.
Qytaıdyń avıatsııa ónerkásibi korporatsııasynyń (AVIC) habarlaýynsha, Wing Loong ushqyshsyz ushý apparaty juma kúni tańerteń Shıgadze qalasyndaǵy áýejaıdan jer silkinisi bolǵan aýmaqqa attandy. Ol apat aýqymyn baǵalaý, jaǵdaıdy baqylaý jáne baılanyspen qamtamasyz etý mindetterin oryndaýǵa jiberildi.
Sondaı-aq 23 qazanǵa qaraǵan túni Qytaı Halyq-azattyq armııasynyń áskerı-áýe kúshteri apat aýmaǵyn áýeden baǵalaý úshin taǵy bir ushqyshsyz apparatty iske qosty.
Jergilikti bıliktiń juma kúngi málimetinshe, beısenbi kúni Beıjiń ýaqytymen saǵat 22:33-te Sıtszan avtonomııalyq aýdanynyń Nagchý qalasyna qarasty Bachen ýezinde bolǵan jer silkinisinen 16 adam qaza taýyp, taǵy 76 adam jaraqat aldy.
Aıta keteıik, buǵan deıin 22 qazan kúni Qytaıda 7 baldyq jer silkinisi bolǵan edi.
Al keıin Tıbettegi jer silkinisinen zardap shekkender sany 65-ke jetti.
