Qytaı jer silkinisinen zardap shekkenderge 80 mln ıýan bóldi
ASTANA. KAZINFORM — Qytaı Sıtszan avtonomııalyq aýdanynda bolǵan 7,0 baldyq jer silkinisinen zardap shekkenderge kómek kórsetip, ınfraqurylymdy qalpyna keltirý úshin 80 mln ıýan (5,4 mlrd teńge) bóldi. Zilzaladan 16 adam qaza taýyp, taǵy 76 adam jaraqat alǵan, dep habarlaıdy Sınhýa.
Jer silkinisi beısenbi kúni saǵat 22:33-te Nagchý qalasynyń Bachen ýezinde bolyp, 16 adamnyń ómirin qıdy. Sondaı-aq 76 adam jaraqat aldy.
Qytaıdyń Qarjy mınıstrligi men Tótenshe jaǵdaılardy basqarý mınıstrligi qutqarý sharalary men zardap shekken turǵyndarǵa kómek kórsetýge 50 mln ıýan bóldi. Al Damý jáne reformalar jónindegi memlekettik komıtet búlingen ınfraqurylym men qoǵamdyq nysandardy qalpyna keltirýge ortalyq bıýdjetten qosymsha 30 mln ıýan qarastyrdy.
Buǵan qosa Qytaı bıligi jer silkinisine baılanysty memlekettik deńgeıdegi tótenshe jaǵdaıǵa den qoıý rejımin 4-deńgeıden 3-deńgeıge kóterip, tabıǵı apattarǵa den qoıýdyń 4-deńgeıli tetigin iske qosty.
Qytaıdyń órt sóndirý-qutqarý qyzmeti izdeý-qutqarý sharalaryn júrgizý úshin apat bolǵan aımaqqa 350 qutqarýshy men 83 arnaıy tehnıka jiberdi. Sondaı-aq Tótenshe jaǵdaılardy basqarý mınıstrligi Sıtszan avtonomııalyq aýdanynyń tótenshe jaǵdaılar jónindegi departamentine apat aımaǵyndaǵy ahýaldy baıqaý úshin «Ilýn» (Wing Loong) barlaý dronyn jiberýdi tapsyrdy.
Juma kúni tańǵy saǵat 6:30-daǵy jaǵdaı boıynsha osy qutqarýshylardyń 120-sy men 27 tehnıka apat aımaǵyna jetti, al Sıtszan aımaqtyq órt sóndirý-qutqarý jasaǵynyń 230 qutqarýshysy men 56 tehnıkasy qosymsha kúsh retinde Nagchý aýmaǵynda boldy.
Tań ata apat aımaǵyna ortalyq jáne óńirlik bılik organdary, sondaı-aq qala men aýdan ákimdikteri bólgen gýmanıtarlyq kómek jetkizildi. Al tańǵy saǵat 04:30-ǵa deıin 1 000 jınalmaly úı men 2 821 tósek, 3 239 shatyr, 4 280 kórpe jáne basqa da kúndelikti qajetti zattar jetkizilgen.
Buǵan deıin Qytaı jer silkinisiniń saldaryn joıýǵa spýtnıkter men drondardy jumyldyrǵanyn habarlaǵan edik.
