Qytaı jer silkinisine den qoıýdyń eń joǵary deńgeıin engizdi
ASTANA. KAZINFORM — Bul týraly Qytaıdaǵy Sıtszan avtonomııalyq aýdanynyń aımaqtyq shtabynan málim etti, dep habarlaıdy Kazinform menshikti tilshisi.
Qytaıdyń ońtústik-batysyndaǵy Sıtszan avtonomııalyq aýdanyndaǵy Shıgatsze qalasynda bolǵan jer silkinisinen keıin tótenshe áreket etý deńgeıi birinshi deńgeıge kóterildi.
6,8 baldyq jer silkinisinen keıin QHR Sý resýrstary mınıstrligi (SRM) zardap shekken aýdandardaǵy sý resýrstary nysandaryn muqııat zertteý jáne qaýip-qaterlerdi baǵalaý, sondaı-aq apattyń qaıtalaný yqtımaldyǵyn anyqtaý úshin jumys toptaryn jiberdi.
Xinhua agenttiginiń habarlaýynsha, vedomstvo tıisti qurylymdarǵa qaýipti aımaqtardyń turǵyndaryna aldyn ala eskertý jasap, olardyń qaýipsiz jerlerge kóshýine qolǵabys etýdi tapsyrǵan. SRM habarlaýynsha, qazirgi ýaqytta úlken qaýip týraly habarlama túsken joq.
QHR Qoǵamdyq qaýipsizdik mınıstrligi (QQM) qutqarý jumystaryn júrgizý, kólik qozǵalysyn baqylaý jáne qoǵamdyq tártipti saqtaý úshin jergilikti polıtsııa kúshterin jumyldyrdy.
Seısenbide QHR Memlekettik keńesiniń premeri Lı Tsıan apattyń aýqymy, zardap shekkender men qaza tapqandar týraly aqparatty jedel túrde naqtylaýdy, qutqarý jumystaryn jan-jaqty júrgizýdi jáne qurbandar men zardap shekkender sanyn barynsha azaıtýdy tapsyrdy.
— Jer silkinisinen zardap shekken aımaq bıik taýly aımaqta, temperatýrasy tómen ústirtte ornalasqandyqtan, zardap shekken aýdan turǵyndary qystan aman shyǵýy úshin olardyń negizgi turmystyq qajettilikterin barynsha qamtamasyz etý qajet, — dep keltirdi Hinhua Qytaı premeriniń sózin.
Sınoptıkter boljamynsha, seısenbi kúni Dınjı ýezinde aýanyń temperatýrasy mınýs 18 gradýstan nól gradýsqa deıin qubylady.
Budan bólek, jer silkinisine baılanysty Djomolýngma taýynyń týrıstik aımaǵy ýaqytsha jabyldy.
Eske salsaq, buǵan deıin Qytaıdyń Sıtszan avtonomııalyq aýdanynyń Shıgatsze qalasyndaǵy Dınjı ýezinde magnıtýdasy 6,8 baldyq jer silkinisi bolǵanyn habarlaǵan edik. Keshe joıqyn jer silkinisinen qaza bolǵandar sany 95-ke jetkeni málim boldy. Alaıda qazirgi ýaqytta 126 adam kóz jumyp, 188 adam zardap shekkeni habarlandy.