Qytaı Jer men Aı arasynda halyqaralyq spýtnıktik jeli qurady
ASTANA. KAZINFORM — Qytaı 2030 jylǵa deıin Jer men Aı arasynda halyqaralyq spýtnıktik jeli qurýdy kózdeıtin Cislunar CubeSat Constellation ǵylymı baǵdarlamasyn iske qosty. Bul týraly Kazinform agenttiginiń menshikti tilshisi Xinhua basylymyna silteme jasap habarlaıdy.
Joba aıasynda salmaǵy 30 kelige deıingi 12U CubeSat formatyndaǵy 30 shaǵyn spýtnık orbıtaǵa shyǵarylady. Olar ǵaryshtyń aýa raıyn baqylap, gamma-sáýlelerdiń jarqylyn barynsha dál tirkeýge múmkindik beredi.
Joba halyqaralyq yntymaqtastyqqa jol ashady. Qazirdiń ózinde Taıland, Serbııa, Mysyr, Senegal, Indonezııa jáne ózge de elderdiń ǵylymı ınstıtýttary jobaǵa atsalysyp jatyr.
Uıymdastyrýshylar mamandar daıarlap, ǵaryshty zertteý jobalaryna halyqaralyq deńgeıde atsalysýǵa múmkindik beretin biryńǵaı ınterfeıs standarttaryn ázirleýdi kózdeıdi.
Aı mańyndaǵy keńistik Jer orbıtasynan bastaý alyp, planetamyzdan shamamen 2 mıllıon shaqyrym qashyqtyqqa deıin sozylyp jatyr. Qytaı bul strategııalyq aımaqty keleshekte aıǵa kosmonavttar ushyrý mıssııalaryn júzege asyrý jáne zertteý stantsııalaryn ornalastyrý úshin basty operatsııalyq shep retinde qarastyrady.
Buǵan deıin Qytaı Aıdyń Ońtústik polıýsin zertteýge arnalǵan zondty ushyrýǵa daıyndap jatqany habarlanǵan bolatyn.
