Qytaı jel energııasymen jumys isteıtin sýasty derekter ortalyǵyn saldy

ASTANA. KAZINFORM – Qytaıda tolyǵymen jel energııasymen jumys isteıtin álemdegi alǵashqy sýasty derekter ortalyǵynyń qurylysy aıaqtaldy, dep habarlaıdy Sınhýa aqparat agenttigi. 

Nysan Shanhaı pılottyq erkin saýda aımaǵynyń Lıngan jańa aýdanynda ornalasqan.

Jergilikti ákimshiliktiń málimetinshe, ornatylǵan qýaty 24 MVt bolatyn jobaǵa salynǵan ınvestıtsııanyń jalpy kólemi 1,6 mlrd ıýandi (shamamen 226 mln dollar) qurady.

Sý astyndaǵy derekter ortalyǵy qýatynyń 95%-dan astamy jańartylatyn kózderden alynady. Dástúrli jerdegi data-ortalyqtarmen salystyrǵanda jańa qondyrǵy qýat tutynýdy 22,8%-ǵa azaıtýǵa múmkindik beredi. Sonymen qatar sýdaǵy jáne jerdegi resýrstardyń paıdalanylýyn sáıkesinshe 100%-ǵa jáne 90%-ǵa qysqartady. 

Lıngan aýdanynyń úkimeti atap ótkendeı, sý asty ortalyǵynyń paıdalanýǵa berilýi – teńizdegi jańartylatyn energııa kózderi men derekter ortalyqtaryn biriktirý áleýetin kórsetetin tehnologııalyq jetistik.

Buǵan deıin Qazaqstan Google Cloud jahandyq jelisindegi óńirlik habqa aınalatynyn jazǵan bolatynbyz.