Qytaı jeke tapsyrys boıynsha jasalatyn elektromobıl óndirisin 18 kúnge deıin qysqartty
ASTANA. KAZINFORM — Qytaı tutynýshylary budan bylaı jeke tapsyrys boıynsha jasalatyn elektromobıldi nebári 18 kúnde ala alady, dep habarlaıdy Kazinform agenttiginiń Beıjińdegi tilshisi Jenmın Jıbao basylymyna silteme jasap.
Qytaı tutynýshylardyń ártúrli qajettiligin qanaǵattandyrý úshin avtomobıl jınaýdyń «ıkemdi óndiris» modelin qarqyndy túrde damytyp jatyr.
— Tutynýshy smartfon arqyly qajettiniń bárin tańdaıdy, al júzdegen óndiristik top óndiris jelilerinde avtomatty túrde qurylady, — dep túsindirdi Avatr kompanııasynyń josparlaý menedjeri Lı Tsıan.
Bul júıe burynǵy qoıma modelin aýystyrdy jáne tapsyrys boıynsha konfıgýratsııalaý ýaqytyn aıtarlyqtaı qysqartty.
— Bes jyl buryn tapsyrys boıynsha jasalǵan avtomobıldi kem degende eki-úsh aı kútýge týra keldi, biraq búgin biz tutynýshy qalaǵan elektromobıldi 18 kúnde shyǵaramyz, — dedi Changan kompanııasynyń tehnologııalyq josparlaý jónindegi bas ınjeneriniń orynbasary Van Jýı.
Joǵary avtomattandyrý ıkemdi óndiristiń negizine aınaldy. Robottar tapsyrys derekterin birden oqıdy jáne jabdyqty qaıta konfıgýratsııalaıdy, bul ártúrli modelderdi bir jelide úzdiksiz jınaýǵa múmkindik beredi.
Buǵan deıin Qytaı gýmanoıd robottardyń álemdik naryǵynyń 97 paıyzyn ıelengen bolatyn.
