Qytaı jibek kórmesinde 100-ge jýyq dızaınerlik týyndy usynyldy
ASTANA. KAZINFORM — Qazaqstanda Qytaıdyń úsh mýzeıi — Jibek mýzeıi, Hýchjoý mýzeıi jáne Týrfan mýzeıi birlesip uıymdastyrǵan «Keremet jibek» kórmesi ótti.
Ekspozıtsııa kelýshilerdi qytaı jibek óneriniń baı mádenı murasymen jáne onyń damýynyń zamanaýı úrdisterimen tanystyrdy.
Kórmege qoıylǵan eksponattardyń biri — qytaılyq qalyńdyqtyń dástúrli toı kóılegi. Ekskýrsııa júrgizýshisi Lına Seriktiń aıtýynsha, qytaılyqtar da qazaqtar sııaqty qyzyl tústi jaqsy kóredi, sondyqtan qyzdar dástúrli túrde úılený toıyna qyzyl tústi kıim kıgen.
Dástúrli kıimdermen qatar kóne motıvter zamanaýı sánmen úılestirilgen týyndylar da usynyldy. Máselen, kıimderdiń birine áıgili Beıjiń operasynyń keıipkeri — áıel jaýyngerdiń beınesi salynǵan.
Kórmede jibektiń ózi de erekshe oryn aldy. Ony óndirý — kúrdeli úderis: aldymen jibek qurttary ósiriledi, sodan keıin olardyń pillálarynan názik jibek jibi alynady. Odan toqylǵan matalar jeńildigimen erekshelenedi ári denege jaǵymdy.
Jibek joǵary baǵalanǵany sonshalyq, ol tek kıim daıyndaýǵa ǵana paıdalanylmaǵan. Kórmede jibek mata elementteri qoldanylǵan altyn áshekeıler, sondaı-aq zamanaýı keste jáne jibek órnekterimen bezendirilgen aıaq kıimder usynyldy.
Jalpy, kelýshiler qytaılyq kıim dızaınerleriniń júzge jýyq týyndysyn tamashalaı aldy.
— Kelýshiler tarapynan turaqty qyzyǵýshylyqty baıqap otyrmyz. Joǵary deńgeıde uıymdastyrylǵan mundaı kórmeler árdaıym kópshiliktiń úlken qyzyǵýshylyǵyn týdyrady, — dep atap ótti Qazaqstan Respýblıkasy Ulttyq mýzeıi dırektorynyń orynbasary Álibek Kúzerbaev.
