Qytaı jasandy ıntellekt kómegimen elektrondy kommertsııany damytpaqshy
ASTANA. KAZINFORM — Qytaıdyń Saýda mınıstrligi onlaın bólshek saýda segmentinde jasandy ıntellekt engizýdi jedeldetýge baǵyttalǵan elektrondy kommertsııany damytý sharalaryn jarııalady, dep habarlaıdy China Daily.
Jańa ereje resmı túrde «Jasandy ıntellekt pen elektrondy kommertsııa» modelin ázirleýge basymdyq beredi. Retteýshi naryq kóshbasshylaryna ǵylymı-zertteý jáne tájirıbelik-konstrýktorlyq jumystarǵa jumsalatyn shyǵyndardy arttyrýdy, tutynýshy tájirıbesin jekeshelendirý úshin neırondyq jelilerdi paıdalanýdy jáne tranzaktsııalyq, logıstıkalyq shyǵyndardy azaıtýdy usynady.
— Qytaı 13 jyl boıy álemdegi eń iri onlaın bólshek saýda naryǵy mártebesin saqtap keledi. Búgingi tańda sala 26 mıllıon otandyq satýshyny biriktiredi jáne búkil álem boıynsha 3,2 mıllıard tutynýshyǵa qyzmet kórsetedi, — dep atap ótti mınıstrliktiń elektrondy kommertsııa departamenti.
Jańa strategııanyń mańyzdy bóligi — shekaraaralyq elektrondy kommertsııany damytý. Qujatta kompanııalardy shetelde tikeleı satyp alý bazalaryn qurýǵa, ónim ımportyn keńeıtýge jáne búkil álemnen kelgen taýarlardyń Qytaı naryǵyna kirýi úshin «tikeleı dálizder» qurýǵa shaqyrady.
Sala sarapshylarynyń pikirinshe, jasandy ıntellekt modelderine kóshý onlaın saýdany maqsatty jáne tıimdi etedi. Bul qadam Qytaıdyń jahandyq bıznesti ulttyq tsıfrlyq ekonomıkaǵa biriktirýge baǵyttalǵan strategııalyq baǵytyn da aıqyndaıdy.
Buǵan deıin Qytaıda jasandy ıntellektti etıkalyq retteýdiń jańa erejeleri bekitilgenin habarlaǵan edik.
