Qytaı jasandy ıntellektini paıdalanýǵa qatysty jańa erejeler engizdi
ASTANA. KAZINFORM — Qytaıdyń Joǵarǵy halyq soty «Jasandy ıntellektke qatysty daýlardy qaraý jónindegi pikirler» atty qujatty jarııalady. Qujat sot tájirıbesin birizdendirýge jáne jasandy ıntellekt salasynyń normatıvtik bazasyn qalyptastyrýǵa baǵyttalǵan, dep habarlaıdy Kazinform agenttiginiń Beıjińdegi menshikti tilshisi.
QHR Joǵarǵy halyq soty tóraǵasynyń orynbasary Tao Kaııýan baspasóz máslıhatynda bul qujattyń qabyldanýy tsıfrlyq dáýirde tehnologııalyq ınnovatsııalardy yntalandyrý men zańdylyqty, ulttyq qaýipsizdikti jáne azamattardyń jeke quqyqtaryn qorǵaý arasyndaǵy tepe-teńdikti qamtamasyz etýge baǵyttalǵanyn aıtty.
Bes bólim men 24 baptan turatyn «Pikirler» Qytaıdyń joǵarǵy sot organy ázirlegen jasandy ıntellekt salasyndaǵy sot protsesterin qaraýǵa arnalǵan alǵashqy arnaıy erejeler jınaǵy boldy.
Qujatqa sáıkes, adamnyń kelisiminsiz vırtýaldy beınesin jasaýǵa, tulǵasyn almastyrýǵa, daýysyn ózgertýge jáne qaıtys bolǵan adamdardyń jeke derekterin paıdalanýǵa tikeleı tyıym salynady.
Avtonomdy kólikter nemese júrgizýshige kómek kórsetý júıeleri qatysqan jol-kólik oqıǵalary kezinde, eger kóliktiń konstrýktsııasynda nemese óndirisinde aqaý anyqtalsa, jaýapkershilik óndirýshiler men satýshylarǵa júkteledi.
Sottarǵa dálelderdi qoldan jasaý úshin generatıvti jasandy ıntellektini paıdalanýǵa qatań tosqaýyl qoıý tapsyryldy. Sondaı-aq avtopılot qosýly kezde júrgizýshiniń nazaryn baqylaý júıelerin aınalyp ótý nemese arnaıy «bógegishterdi» paıdalaný jol-kólik oqıǵasyna ákelgen jaǵdaıda, sondaı-aq alaıaqtyq pen kompıýterlik júıelerge ruqsatsyz kirý úshin qylmystyq jaýapkershilik qarastyrylǵan.
Eske salaıyq, buǵan deıin AQSh pen Qytaı qyrkúıek aıynyń ortasynda jasandy ıntellekt qaýipsizdigine arnalǵan alǵashqy resmı kelissózderdi ótkizýdi josparlap otyrǵanyn habarlaǵanbyz. Taraptar ozyq jasandy ıntellekt modelderin damytýǵa baılanysty táýekelderdi talqylamaq.
