Qytaı jasandy ıntellektini qaýipti aýa raıyn boljaýǵa úıretti
ASTANA. KAZINFORM – Qytaı taıfýn, naızaǵaı jáne nóser jańbyr sııaqty qaýipti aýa raıy qubylystaryn aldyn ala anyqtaýǵa kómektesetin jasandy ıntellekt modelderin tanystyrdy. Jańa júıelerdiń biri qolaısyz aýa raıy týraly tórt saǵat buryn eskertýge múmkindik beredi, dep habarlaıdy Sınhýa agenttigi.
Jańa tehnologııalar Hýnan provıntsııasynyń Chansha qalasynda ótken spýtnıktik derekterdi paıdalanýshylar konferentsııasynda tanystyryldy. Olar Qytaıdyń «Fenıýn» meteorologııalyq spýtnıkterinen alynǵan aqparat negizinde ázirlengen.
Usynylǵan júıelerdiń biri taıfýndardy taldaýǵa arnalǵan. Ol daýyldyń ornalasqan jerin, qurylymyn, qarqyndylyǵy men ózgeristerin avtomatty túrde anyqtaıdy. Jasandy ıntellekt modeli taıfýnnyń jeti sıpattamasyn tanyp, nátıjelerdi ár 15 mınýt saıyn jańartady. Al taldaý qorytyndysyn mátin túrinde nebári 27 sekýndta ázirleıdi.
Ekinshi júıe naızaǵaı, ekpindi jel jáne nóser jańbyrmen qatar júretin kúshti konvektsııalyq qubylystardy óte qysqa merzimde boljaýǵa arnalǵan.
Ol úshin júıe «Fenıýn-4» spýtnıginiń sońǵy eki saǵattaǵy úzdiksiz baqylaý derekterin paıdalanady. Jasandy ıntellekt bulttardyń ári qaraı qalaı ózgeretinin taldap, qaýipti aýa raıy qubylystary bolýy yqtımal aımaqtardy anyqtaıdy. Osylaısha, turǵyndarǵa qaýip týraly tórt saǵat buryn eskertýge bolady.
Qytaı meteorologııalyq basqarmasynyń málimetinshe, jańa tehnologııalar spýtnıktik monıtorıng pen taıfýndar jáne basqa da qaýipti qubylystar týraly erte eskertý júıesiniń tıimdiligin arttyrady.
«Fenıýn» spýtnıkteri Qytaıdyń ulttyq meteorologııalyq baqylaý júıesine kiredi. Qazir osy serııadaǵy 10 apparat orbıtada jumys istep tur. Olardyń derekterin 141 el men aımaq paıdalana alady.
Aıta keteıik, Qazaqstan da qaýipti aýa raıy qubylystary týraly erte eskertý tehnologııalaryn damytyp jatyr. Qyrkúıek aıynda «Qazgıdromet» Qytaı meteorologııalyq basqarmasymen MAZU júıesin qysqa merzimdi aýa raıy boljamy men jasandy ıntellekt tehnologııalaryn qoldaný baǵytynda paıdalaný múmkindigin talqylaǵan edi.
