Qytaı jas mamandarǵa arnalǵan jańa vıza engizedi
ASTANA. KAZINFORM — 1 qazannan bastap Qytaıda ǵylym men tehnologııa salasyndaǵy jas sheteldik mamandarǵa arnalǵan jańa K sanatyndaǵy vıza kúshine enedi, dep habarlaıdy QHR Memlekettik keńesi.
Jańa vıza halyqaralyq almasý men yntymaqtastyq múmkindikterin keńeıtýge baǵyttalǵan. Onyń ıeleri qoldanystaǵy 12 túrli vızamen salystyrǵanda keńirek jeńildikter jıyntyǵyna ıe bolady. Oǵan ruqsat etilgen kirý sanynyń artýy, vızanyń uzaq merzimge berilýi jáne elde bolý merziminiń ulǵaıýy kiredi.
K vızasynyń ıeleri Qytaı aýmaǵynda bilim berý, mádenı jáne ǵylymı-tehnıkalyq almasý baǵdarlamalaryna qatysa alady, sondaı-aq kásipkerlikpen jáne iskerlik qyzmetpen aınalysa alady.
Belgilengen jas, bilim jáne kásibı talaptardan bólek, bul vızany rásimdeý úshin qytaılyq jumys berýshiden nemese uıymnan shaqyrtý talap etilmeıdi. Bul vıza alý protsesin aıtarlyqtaı jeńildetedi.
Jańa vıza sanaty halyqaralyq baılanystardy keńeıtý úshin vızalyq erejelerdi kezeń-kezeńimen jeńildetý aıasynda engizilýde. 2025 jylǵy shildeniń sońyndaǵy jaǵdaı boıynsha Qytaı 75 memleketpen birjaqty vızasyz rejım nemese ózara vızadan bosatý týraly kelisim ornatqan.
Buǵan deıin Qytaıdyń 75 eldiń azamattaryna vızasyz rejım engizgeni habarlanǵan bolatyn.
Aıta ketelik Qytaıda chıkýngýnıaǵa arnalǵan ekspress-test ázirlengen edi.