Qytaı Japonııany áskerı bıýdjet týraly aqparatty burmalady dep aıyptady
ASTANA. KAZINFORM – Óziniń áskerı ekspansııasyn aqtaý úshin Qytaıdyń qorǵanys bıýdjetin burmalaǵan Japonııa synǵa ushyrady. Bul týraly Sınhýa agenttigi jazdy.
Qytaı Qorǵanys mınıstrliginiń resmı ókili Tszıan Bın sársenbi kúni Japonııany Qytaıdyń áskerı shyǵyndaryn ádeıi asyra kórsetip otyr dep aıyptady. Onyń aıtýynsha, bul «Ury aıqaıy: uryny ustańdar!» degen máteldiń kórinisi jáne Japonııanyń óz áskerı ekspansııasyn aqtaýǵa baǵyttalǵan.
Tszıan Bın bul málimdemeni japon saıasatkerleriniń Qytaıdyń qorǵanys shyǵyndaryn burmalap túsindirýine jaýap retinde jasady.
– Qytaıdyń qorǵanys shyǵyndary JІÓ-niń 1,5 paıyzynan azyn quraıdy. Bul kórsetkish AQSh sııaqty iri áskerı derjavalardan edáýir tómen, sondaı-aq álemdik ortasha deńgeıden jáne NATO-nyń JІÓ-niń 2 paıyzynan asatyn maqsatty kórsetkishinen de tómen, — dedi ol.
Onyń sózinshe, Qytaıdyń qorǵanys bıýdjeti oryndy, qalypty jáne ustamdy túrde ósip keledi. Bul ósim tek eldiń egemendigin, qaýipsizdigin jáne damý múddelerin qorǵaýǵa, sondaı-aq jahandyq beıbitshilik pen turaqtylyqty saqtaýǵa baǵyttalǵan.
– Japonııa tarapyn ózine jıirek syn kózben qarap, jańylystyratyn aqparattyq naýqandaryn toqtatýǵa jáne mılıtarızmniń sátsiz tájirıbesin eshqashan qaıtalamaýǵa shaqyramyz, — dep málimdedi Qytaı Qorǵanys mınıstrliginiń ókili.
Aıta keteıik, byltyr Qytaı Sanae Takaıtıdiń málimdemesinen soń Japonııaǵa qarsy qysymdy kúsheıtti.
