Qytaı jáne Orta Azııa memlekettik basqarý akademııalarynyń jelisi qurylady
Memlekettik basqarý salasyn damytý maqsatynda Qytaı jáne Orta Azııa basqarý akademııalarynyń jelisin qurý jóninde kelisimge qol qoıyldy. Bul týraly QR Prezıdentiniń janyndaǵy Memlekettik basqarý akademııasynyń baspasóz qyzmetinen málim etti, dep habarlaıdy Kazinform.
Qytaı Halyq Respýblıkasynyń astanasy Beıjińde «Órkenıetaralyq baılanys jáne jahandyq damý» taqyrybyndaǵy forým ótip jatyr. Sharaǵa Qazaqstan Respýblıkasy Prezıdentiniń janyndaǵy Memlekettik basqarý akademııasynyń akademııalyq qyzmet jónindegi vıtse-rektory Margarıta Qadyrova, Akademııanyń Qaraǵandy oblysy fılıalynyń dırektory Serikjan Baıbosynov, Aqtóbe oblysy fılıalynyń dırektory Saıda Sádýaqasova qatysýda. Forýmnyń ashylý saltanatynda Astana memlekettik qyzmet haby basqarýshy komıtetiniń tóraǵasy Álıhan Báımenov baıandama jasady.
Akademııa vıtse-rektory Margarıta Qadyrova forýmda sóz sóılep, memlekettik basqarý salasyndaǵy Qazaqstan men Qytaı baılanysy týraly baıandama jasady.
«Órkenıetaralyq baılanys jáne jahandyq damý forýmynda Qazaqstan Respýblıkasy Prezıdentiniń janyndaǵy Memlekettik basqarý akademııasy men Qytaıdyń Ulttyq Basqarý Akademııasy arasyndaǵy seriktestik týraly, bolashaqta qolǵa alynatyn ortaq jobalarymyz ben bilim baǵdarlamalarymyz jaıly baıandama jasadym. Sondaı-aq forým aıasynda kóshbasshylyqty damytý jáne jańǵyrtý baǵytynda Qytaı jáne Orta Azııa dıalogy júrgizildi. Eń basty jańalyq – búgingi kelissózder nátıjesinde memlekettik basqarý salasyn damytý maqsatynda Qytaı jáne Orta Azııa basqarý akademııalarynyń jelisin qurý jóninde kelisimge qol qoıyldy. Atalǵan kelisim memlekettik qyzmetshilerdi oqytý, Akademııamen ortaq zertteýler júrgizý, tájirıbe almasý, trenıngter ótkizý, jalpy memleketti basqarý baǵytyndaǵy jobalardy ózara senim men syılastyq, ashyqtyq qaǵıdattaryna súıene otyryp júzege asyrýǵa baǵyttalǵan», – dedi Margarıta Bólegenqyzy.
Qytaıda Basqarý akademııasy men Joǵary partııa mektebi biriktirilgen. Akademııa rektory Úkimet basshysynyń orynbasary bolyp tabyldy. Akademııa Qytaı eliniń ıdeologııasyn qalyptastyrý men aıqyndaýda basty qyzmet atqarady. 20 mln jýyq memlekettik jáne partııa qyzmetkerleri men iri memlekettik kásiporyndar qyzmetkerleriniń biliktiligin arttyrý – osy joǵary oqý ornynyń tikeleı mindeti.
