Qytaı janarmaı men dızel baǵasyn bir aıda ekinshi ret kóterdi
ASTANA.KAZINFORM - Qytaı benzın men dızel otynynyń baǵasyn kóterdi, dep habarlaıdy Beıjińdegi Kazinform agenttiginiń menshikti tilshisi.
Agenttik álemdik munaı baǵasynyń kúrt ósýin jáne olardyń ishki naryqqa áserin azaıtý úshin qoldanystaǵy baǵa belgileý mehanızmi aıasynda munaı ónimderine ýaqytsha baǵa baqylaýy engizilip jatqanyn atap ótti.
24 naýryzdan bastap standartty benzın men dızel otynynyń ishki baǵasy tonnasyna sáıkes 1160 ıýanǵa (shamamen 168 dollar) jáne 1115 ıýanǵa (shamamen 161 dollar) ósti. Ortalyqtandyrylǵan basqarylatyn mýnıtsıpalıtetter men avtonomııalyq aımaqtardy qosa alǵanda, árbir aımaq úshin eń joǵary bólshek saýda baǵasynyń shekti mánderi belgilendi.
CNPC, Sinopec jáne CNOOC sııaqty iri memlekettik korporatsııalarǵa, sondaı-aq basqa da munaı óńdeý zaýyttaryna naryqtyq jetkizilimdi qamtamasyz etý jáne memlekettik baǵa saıasatyn qatań saqtaý úshin munaı ónimderin úzdiksiz óndirý men logıstıkany qamtamasyz etý tapsyryldy.
Tıisti jergilikti mekemelerge tarıfterdi qadaǵalaýdy kúsheıtý, baǵa belgileý týraly zańdardy buzýdyń aldyn alý jáne naryqtyq tártipti saqtaý tapsyryldy.
Aıta keteıik, Qytaıda standartty benzın men dızel otynynyń baǵasy 10 naýryzdan bastap tonnasyna sáıkesinshe 695 (100,90 dollar) jáne 670 (97,20 dollar) ıýanǵa kóterildi.
Biz buǵan deıin Qytaı benzın men dızel otynynyń bólshek saýda baǵalaryn kótergenin habarlaǵan bolatynbyz.
