Qytaıǵa Qazaqstannan 1767 tonna zyǵyr jetkizildi

ASTANA. KAZINFORM — Jýyrda Qytaıdyń soltústik-batysyndaǵy Nınsıa-Hýeı avtonomııalyq aýdanynyń ákimshilik ortalyǵy — Inchýan qalasyna Qytaı–Ortalyq Azııa transshekaralyq júk tasymaldary aıasynda Qazaqstannan 1767 tonna zyǵyr tuqymy jetkizildi. Bul týraly Sınhýa aqparat agenttigi jazdy.

Ýaqtyly jetkizilgen bul aýyl sharýashylyǵy shıkizaty joǵary sapaly ósimdik maıyn óndirý úshin óńdeledi. Atalǵan ónim bıyl 17 aqpanǵa sáıkes keletin aı kúntizbesi boıynsha dástúrli Qytaı Jańa jylyn (Chýntsze — Kóktem merekesi) toılaý qarsańynda tutynýshylar arasynda artatyn suranysty qanaǵattandyrý maqsatynda merekelik aldyndaǵy naryqqa shyǵarylatyn bolady.

Chinanews.com.cn ınternet-portalynyń habarlaýynsha, zyǵyr tuqymynyń bul iri partııasy Qytaı–Qazaqstan shekarasyn Qorǵas ótkizý pýnkti arqyly kesip ótip, bondtyq rejımde Inchýan temirjol logıstıkalyq ortalyǵynyń ońtústik júk parkine jetkizilgen. Odan ári júk dereý avtokólik arqyly qalanyń keshendi bondtyq aımaǵyna tasymaldanyp, sol jerde tereń óńdeýden ótedi. Zyǵyr tuqymynan óndirilgen taǵamdyq ósimdik maıy Inchýan qalasynyń jáne oǵan irgeles aýdandardyń naryqtaryna satylymǵa shyǵarylady.

Nınsıa-Hýeı avtonomııalyq aýdany Qytaıdaǵy zyǵyr tuqymyn óńdeý men tutynýdyń negizgi óńirleriniń biri bolyp sanalady. Qytaı–Ortalyq Azııa baǵytyndaǵy temirjol júk tasymaly marshrýttarynyń iske qosylýy bul aýyl sharýashylyǵy ónimin transshekaralyq jetkizýdi arzandatyp, jedeldetýmen qatar, jergilikti agroónerkásip kesheni kásiporyndaryn turaqty shıkizatpen qamtamasyz etýge múmkindik berdi, dep atap ótti sala ókilderi.

Eske sala ketsek, «Qazaqstan temir joly» UK» derekterine sáıkes, 2025 jylǵy qyrkúıekten 2026 jylǵy 31 qańtarǵa deıin 5,8 mln tonna astyq eksporttalǵan.