Qytaı jalǵan ChatGPT jáne DeepSeek qyzmetteri úshin kompanııalarǵa aıyppul saldy

ASTANA. KAZINFORM – Qytaıdyń Naryqty retteý jónindegi memlekettik basqarmasy (SAMR) paıdalanýshylardy aldaý maqsatynda ózderin OpenAI-dyń DeepSeek jáne ChatGPT qyzmetteri retinde kórsetken birqatar kompanııaǵa aıyppul saldy.

AZƏRTAC agenttiginiń habarlaýynsha, bul shara jasandy ıntellekt sektoryndaǵy josyqsyz básekelestik pen zııatkerlik menshik urlyǵyna qarsy kúrestiń kezekti qadamy boldy.

Qytaı naryq retteýshisi Tencent Holdings kompanııasyna tıesili WeChat sýperqosymshasynda jalǵan ChatGPT servısin iske qosqany úshin Shanghai Shangyun Internet Technology kompanııasyna 62 692,70 ıýan (9 034 dollar) aıyppul saldy.

SAMR juma kúni jarııalaǵan málimdemege sáıkes, atalǵan servıs ózin OpenAI chat-botynyń resmı qytaılyq nusqasy retinde kórsetip, paıdalanýshylardy jańylystyrǵan jáne olardy JI kómegimen dıalog júrgizý úshin aqy tóleýge májbúrlegen. Bul Qytaıdyń josyqsyz básekelestikke qarsy zańyn buzý bolyp sanalady.

Taǵy bir jaǵdaıda Hangzhou Boheng Culture Media kompanııasy «DeepSeek-ti jergilikti ornalastyrý» qyzmetin usynǵan ruqsatsyz veb-saıt jasaǵany úshin 30 myń ıýan (4 323 dollar) aıyppul salyndy.

Alaıaqtyq saıtta resmı DeepSeek platformasyna óte uqsas qaripter, belgisheler jáne bet dızaıny paıdalanylǵan.