Qytaı jalǵan blogerler men jalǵan aqparatqa qarsy kúresti kúsheıtti
ASTANA. KAZINFORM — Qytaıdyń Kıberkeńistik isteri jónindegi ortalyq komıssııasy keńsesi «Taza ınternet: qysqa beınelerdegi oıdan shyǵarylǵan beınelermen kúres» atty eki aılyq arnaıy naýqandy bastady, dep habarlaıdy Kazinform agenttiginiń Beıjińdegi menshikti tilshisi.
Vedomstvo blogerlerdiń qaralym jınaý jáne adal emes jolmen tabys tabý maqsatynda ózderin basqa adamdar retinde tanystyrý áreketteriniń jolyn kesýdi kózdep otyr. Retteýshi organ zańbuzýshylyqtyń bes negizgi sanatyna nazar aýdardy:
– qaıyrymdylyq jınaý jáne taýarlardy ilgeriletý maqsatynda kýrer, kedeı fermer, múgedek nemese aýyr naýqas adamdardyń rólin somdaıtyn qoıylymdyq beınerolıkter;
– tıisti lıtsenzııasy rastalmaǵan dáriger, zańger jáne muǵalimderdiń jalǵan paraqshalaryn jasap, aqyly keńes pen kýrstar satý;
– tanymal adamdarǵa elikteý úshin dıpfeıkterdi paıdalaný, qoǵam nazaryndaǵy oqıǵalarǵa qatysýshylar retinde ózderin tanystyrý jáne «kóleńkeli akkaýnttar» qurý;
– sándi ómir saltyn kórsetý úshin jalǵa alynǵan zattar men atrıbýttardy paıdalaný, tez baıý shemalaryn jarnamalaý, sondaı-aq astrologtar men «fenshýı sheberleriniń» qyzmetterin usyný;
– qoǵamda alaýyzdyq týǵyzýy múmkin otbasylyq zorlyq-zombylyq, adam urlaý jáne jalǵan qaıyrymdylyq týraly oıdan shyǵarylǵan oqıǵalar.
Naýqan aıasynda retteýshi organ platformalardy jalǵan akkaýnttardy buǵattaýǵa, kontenttiń tıisti túrde tańbalanýyn qatań baqylaýǵa jáne mundaı beınerolıkterdi usynystar algorıtminen alyp tastaýǵa mindetteıdi. Sondaı-aq vedomstvo jasandy ıntellekt arqyly jasalǵan avatarlardy paıdalanyp jasalatyn alaıaqtyq shemalardan egde jastaǵy adamdardy qorǵaý sharalaryn kúsheıtedi.
Buǵan deıin Qytaıda shyǵarylǵan jańa shaǵyn serıaldardyń 90 paıyzdan astamy jasandy ıntellekt kómegimen jasalǵany habarlanǵan.
