Qytaı zeınetaqyny merziminen buryn sheshý negizderin keńeıtedi
ASTANA. KAZINFORM — Qytaıda 1 qyrkúıekten bastap jeke zeınetaqy shottarynan qarajatty merziminen buryn alý negizderiniń tizimin keńeıtetin jańa erejeler kúshine enedi, dep habarlaıdy Sınhýa.
Adam resýrstary jáne áleýmettik qamtamasyz etý mınıstrligi basqa tórt memlekettik organmen birlesip shyǵarǵan tsırkýlıarda jeke zeınetaqy jınaqtaryn eleýli medıtsınalyq shyǵyndar nemese uzaq merzimdi jumyssyzdyq jaǵdaıynda paıdalanýǵa bolatyny qarastyrylǵan.
Azamattar qarajatty ótken jyly óziniń, jubaıynyń nemese kámeletke tolmaǵan balalarynyń emdelýge jumsaǵan shyǵyndary aımaqtaǵy ortasha jan basyna shaqqandaǵy tabystan asyp ketken jaǵdaıda sheship alýǵa quqyly.
Sondaı-aq ótinish berýshi sońǵy eki jyl ishinde keminde 12 aı jumyssyzdyq boıynsha járdemaqy alǵan nemese qazirgi ýaqytta eń tómengi áleýmettik tólemdi alatyn bolsa, aqshany sheship alýǵa ruqsat etiledi.
Buryn jeke zeınetaqy jınaqtary tek zańda belgilengen zeınetkerlik jasqa jetkende, sondaı-aq eńbekke qabilettiligin tolyq joǵaltqanda nemese shetelge kóshken jaǵdaıda ǵana paıdalanylýy múmkin bolatyn.
Eske sala ketsek, Qytaıda jeke zeınetaqy jınaqtaý júıesi alǵash ret 2022 jyldyń qarashasynda tańdaýly qalalarda pılottyq rejımde iske qosyldy, al 2024 jyldyń sońyna qaraı ol búkil elde qoljetimdi boldy.
Buǵan deıin Qytaıda zeınetaqy qalaı jınaqtalatyny týraly jazǵan bolatynbyz.