Qytaı vıtse-premeri Qazaqstandaǵy reformalardy joǵary baǵalady
ASTANA. KAZINFORM – Seısenbi kúni Beıjińdegi Halyq jınalystary úıinde Qytaıǵa úsh kúndik jumys saparymen barǵan elimizdiń Premer-mınıstriniń birinshi orynbasary Nurlybek Nálibaev QHR Memlekettik keńesiniń vıtse-premeri Dın Sıýesıanmen kezdesti, dep habarlaıdy Kazinform-nyń Beıjińdegi menshikti tilshisi.
– Qytaı men Qazaqstan – jaqyn kórshiler, jaqsy dostar jáne senimdi seriktester. Bıyl shildede Jasandy ıntellekt jónindegi dúnıejúzilik konferentsııa aıasynda Qytaı tóraǵasy Sı Tszınpın men Qazaqstan Prezıdenti Qasym-Jomart Toqaev kezdesti. Olar ekijaqty qarym-qatynastardyń barlyq baǵyty boıynsha jan-jaqty pikir almasyp, birqatar jańa mańyzdy ýaǵdalastyqtarǵa qol jetkizdi, – dedi Dın Sıýesıan.
Onyń aıtýynsha, budan kóp uzamaı eki eldiń basshylary Bishkekte ótken Shanhaı yntymaqtastyq uıymy sammıtine jáne BRIKS elderi kóshbasshylarynyń kezdesýine birge qatysty. Bul jahandyq basqarý júıesin reformalaý men jetildirýge jańa serpin berdi.
– Osy jyldyń basynan beri Prezıdent Toqaevtyń basshylyǵymen Qazaqstanda saıası reformalar dáıekti túrde ilgerilep keledi. Jańa Konstıtýtsııa sátti qabyldanyp, Quryltaı saılaýy ótip, Úkimettiń jańa quramy jasaqtaldy. Elimizdiń áleýmettik-ekonomıkalyq damýy da qarqyn alyp keledi. Biz máńgilik strategııalyq seriktester retinde qazaqstandyq dostarymyzdyń bul jetistikterine shyn júrekten qýanyshtymyz, – dep atap ótti ol.
QHR vıtse-premeri eki el basshylarynyń mańyzdy tapsyrmalaryn jan-jaqty júzege asyrý jáne halyqtardyń ıgiligi úshin praktıkalyq yntymaqtastyqta jańa nátıjelerge qol jetkizý maqsatynda Qazaqstan tarapymen tyǵyz jumys isteýge daıyn ekenin bildirdi.
Óz kezeginde Nurlybek Nálibaev Qazaqstan men Qytaı arasyndaǵy yntymaqtastyq komıteti aıasynda qytaılyq tarappen tyǵyz ári jemisti ózara is-qımyldy jalǵastyrýǵa daıyn ekenin rastady. Onyń aıtýynsha, bul tetik eki el arasyndaǵy máńgilik jan-jaqty strategııalyq seriktestikti ilgeriletýdiń negizgi quraldarynyń biri sanalady.
Kelissózder barysynda taraptar saýda, ınvestıtsııa, jasandy ıntellekt, mádenı-gýmanıtarlyq jobalar jáne týrızmdi damytý salalaryndaǵy yntymaqtastyqtyń keń aýqymdy máselelerin talqylady.
Buǵan deıin Qazaqstan Beıjińdegi THKB jónindegi aýqymdy kezdesýge qatysqany habarlanǵan edi.
