Qytaı vıtse-premeri: EO-men protektsıonızmge qarsy birlese áreket etýge daıynbyz

ASTANA. KAZINFORM — Qytaıdyń vıtse-premeri He Lıfen 27 naýryz kúni Qytaıdyń Eýropalyq Odaqpen (EO) saýda-ekonomıka salasyndaǵy kelispeýshilikterdi rettep, birjaqtylyq pen protektsıonızmge qarsy birlese kúresýge daıyn ekenin málimdedi.

Sıngapýrlyq Lianhe Zaobao basylymynyń jazýynsha, He Lıfen bul týraly Beıjińde Eýrokomıssııanyń saýda jáne ekonomıkalyq qaýipsizdik jónindegi komıssary Marosh Shefchovıchpen kezdesýinde aıtty. Ol Qytaı tarapy EO-men dıalog pen ózara baılanysty nyǵaıtýǵa, saýda salasyndaǵy kelispeýshilikterdi retteýge, ózara ashyqtyqty keńeıtýge jáne taraptar arasyndaǵy saýda-ekonomıkalyq qatynastardy turaqty túrde damytýǵa múddeli ekenin atap ótti. Sondaı-aq, ol Qytaı men Eýroodaqtyń kópjaqty saýda júıesin qorǵaý maqsatynda birjaqtylyq pen protektsıonızmge qarsy birlesip kúresýi keregin qadap aıtty.

Marosh Shefchovıch X platformasynda EO men Qytaıdyń ekijaqty jáne jahandyq máselelerdi sheshýge baılanysty ortaq múddesi bar ekenin jazdy.

— Biz saýda jáne ınvestıtsııalyq qarym-qatynastarymyzdy shynaıy túrde qaıtadan teńestirýimiz qajet, — dedi ol.

AQSh prezıdenti Donald Tramptyń kedendik tarıfterge qatysty qoldanǵan saıasaty Qytaı-AQSh jáne EO-AQSh qarym-qatynastaryna aıtarlyqtaı áser etti. Bıyl aqpannan bastap Tramp Qytaıdan ımporttalatyn barlyq taýarǵa 20% qosymsha baj salyǵyn engizgen bolatyn.

Tramp 26 naýryz kúni ımporttyq avtokólikterge jańa tarıf engizetinin málimdedi. Bul shara Eýropanyń, ásirese Germanııanyń avtokólik óndirýshilerine aıtarlyqtaı soqqy bolmaq, sebebi nemis avtokólik eksportynyń shamamen 25%-y AQSh-qa baǵyttalǵan.

Sonymen qatar, EO Qytaımen ekonomıkalyq qarym-qatynasqa baılanysty birqatar máselege alańdaýshylyq bildirip otyr. Atap aıtqanda, EO ózara tıimdi memlekettik satyp alý múmkindikteriniń bolmaýyna, naryqtyq kedergilerdiń joıylmaýyna jáne transshekaralyq derekter almasýdyń qıyndyǵyna razy emes.