Qytaı týý kórsetkishin arttyrý úshin kontratseptıvtik quraldarǵa salyq engizedi

ASTANA. KAZINFORM — 2026 jyldyń 1 qańtarynan bastap Qytaıda kontratseptıvtik preparattar men quraldardyń satylymyna qosylǵan qun salyǵy (QQS) salynady, dep habarlaıdy jergilikti BAQ.

Qytaı Halyq Respýblıkasynyń QQS týraly zańynyń jańartylǵan nusqasynda kontratseptıvtik preparattar men quraldar buryn QQS salyna qoımaıtyn taýarlar tiziminen shyǵarylǵan.

Qytaı Halyq Respýblıkasynyń QQS týraly zańynda jańartý engizilip, kontratseptıvtik preparattar men músheqaptar endi burynǵydaı salyqtan bosatylmaıtyn taýarlar tizimine qosyldy. ıAǵnı, budan bylaı olardan QQS alynatyn bolady.

Habarlanǵandaı, salyqtyq jeńildiktiń alynýy kontratseptıv óndirýshiler men satýshylarǵa tikeleı áser etedi. Kompanııalar shyǵyn qurylymyn qaıta qarastyrady, baǵa saıasatyn túzetedi jáne naryqtaǵy básekeniń kúsheıýine daıyndalady.

Bloomberg agenttigi habarlaǵandaı, Qytaı sońǵy otyz jylda alǵash ret músheqaptarmen qosa, kontratseptıvtik preparattarǵa 13 paıyzdyq QQS engizip otyr.

Sonymen qatar, bul ózgerister balalarǵa kútim kórsetý qyzmetteri, qarttar úıleri, múgedekterge kómek kórsetetin uıymdar jáne úılený toılarymen baılanysty qyzmetterdi QQS-ten bosatady. 

Amerıkalyq basylym bul ózgeristerdi Qytaıdaǵy týý kórsetkishiniń kúrt tómendeýin tejep, otbasylarǵa balalardy kóbirek dúnıege ákelýge yntalandyrý sharalarynyń bóligi dep baǵalaıdy, sebebi el halqy úshinshi jyl qatarynan azaıyp keledi.

Budan buryn Qytaı Qarjy mınıstrligi bıyl ortalyq bıýdjetten bala kútimi boıynsha sýbsıdııalardy tóleýge 90 mıllıard ıýan (shamamen 12,6 mıllıard AQSh dollary) bólinetinin málimdedi.