Qytaı týroperatorlary Shyǵys Qazaqstanǵa týrıst ákelýge qyzyǵýshylyq tanytyp otyr
ÓSKEMEN. KAZINFORM — Shyǵys Qazaqstan oblysynda qytaılyq týrıstik kompanııalardyń ókilderimen kezdesý ótip, týrızm salasyndaǵy ekijaqty áriptestik jaıy talqylandy.
ShQO kásipkerlik jáne ındýstrıaldyq-ınnovatsııalyq damý basqarmasynyń basshysy Ardaq Mádıev Qytaı Halyq Respýblıkasynyń Shyńjań-Uıǵyr avtonomııalyq aýdanyndaǵy týrıstik kompanııalardyń ókilderimen kezdesti.
Mundaǵy maqsat — transshekaralyq yntymaqtastyqty damytý jáne týrızm salasyndaǵy ekijaqty baılanysty nyǵaıtý.
— 2025 jyly Qytaıdyń Qazaqstandaǵy týrızm jyly ótedi. Soǵan jan-jaqty daıyndyq júrgizip jatyrmyz. Qytaılyq týrısterdiń qyzyǵýshylyqtaryn zerttep shyqtyq. Qazaqstandaǵy ásem tabıǵattyń 47 paıyzy ShQO-da shoǵyrlanǵan. Munda taý da, sý da, orman da bar. Sol úshin kórshi elden kelgisi keletinder kóp bolady degen nıettemiz, — deıdi Ardaq Mádıev.
Bir jylda Qytaıdan álemniń ár túkpirine 150 mln týrıst saıahatqa shyǵady eken. Al Shyǵys Qazaqstannyń týrıstik nysandary bir mezette 20 myń týrısti qabyldaı alady.
— Týrıster úshin demalystyń san alýan túrin usynbaqpyz. Jeke jáne toptyq týrlar bolady. Bir toptyq týrda 30-35 adam qamtylady. Al oblystaǵy týrıstik obektiler modernızatsııalaýdan ótken soń bul sandy kóbeıtýge bolady. Qytaı elimen de birlesip túrli aýqymdy jobalardy qolǵa alǵymyz keledi, — deıdi ShQO kásipkerlik jáne ındýstrıaldyq-ınnovatsııalyq damý basqarmasynyń basshysy.
Shyǵys Qazaqstan men Almaty qalasy ortaq týrpaket ázirlep jatyr. Sol arqyly týrıst birinshi Almatyǵa kelip, sosyn ShQO-ny tamashalaı alady. Osylaı bir saparda Qazaqstannyń eki kórikti óńirine barady.
— Biz qysqy týrızmmen aınalysamyz. Ózim buryn Shyǵys Qazaqstanda jumys istegenmin. Sol úshin bul jaq maǵan ystyq. Ólkeniń tarıhy tereń, tabıǵaty sulý. Qytaıda halyqqa jarnama jasap, týrısterdi osynda tartyp jatyrmyz. Mysaly, Altaı aımaǵynda 3 úlken taý shańǵysy kýrorty bar. Solarǵa jyl saıyn 150 myń adam baryp demalady. Solardyń birazyn ShQO-ǵa jiberýge bolady, — deıdi Shyńjań-Uıǵyr avtonomııalyq aýdanyndaǵy týrıstik kompanııalardyń biriniń ókili Go Shaotszıan.
