Qytaı týrısteriniń jańa jyldyq tańdaýy: Qazaqstan top-7 baǵyttyń qatarynda

ASTANA. KAZINFORM –  Qazaqstan QHR týrısteri úshin tanymal 7 sheteldik baǵyt qataryna kirdi. 

Qazaqstan jańa jyldyq merekeler kezeńinde QHR týrısteri arasynda eń suranysqa ıe sheteldik baǵyttardyń top-7 qataryna kirdi. Bul týraly Qytaıdyń iri onlaın-týroperatorlarynyń biri Tongcheng Travel jarııalaǵan «2026 jylǵy jańa jyldyq merekelerge arnalǵan týrıstik úrdister týraly» esepte kórsetilgen.

— Derekterge sáıkes bıylǵy jeltoqsan aıynyń basynan jańa jyldyq merekelerge deıingi kezeńde Qytaıdyń iri qalalarynan Qazaqstanǵa áýe bıletterin brondaý sany ótken jyldyń osy kezeńimen salystyrǵanda 50% astam artqan. Qonaqúılerdi brondaý kórsetkishi 80% asa ósti.

Qytaıdyń shyǵý týrızmi qurylymynda Ortalyq Azııa men Soltústik Eýropa baǵyttaryna qyzyǵýshylyqtyń artyp kele jatqany atap ótiledi. Qazaqstan qysqy demalys pen belsendi týrızm túrleri úshin perspektıvalyq baǵyt retinde óz pozıtsııasyn nyǵaıtyp keledi. Qytaı týrısteri arasynda eń tanymal qalalar — Almaty men Astana, — delingen Qazaq týrızm habarlamasynda.

Tongcheng Travel sarapshylary Qazaqstandaǵy taý shańǵysy oryndaryna saıahatqa suranys qarasha aıynyń sońynan bastap artqanyn atap ótedi.

Atap ótken jón, bıylǵy 11 aıda QHR-dan Qazaqstanǵa kelýshiler qatary 876 myńnan asty. Al 2024 jyldyń 12 aıynda bul kórsetkish 655 myń bolǵan. Bul elimizge degen joǵary qyzyǵýshylyq deńgeıin, Qazaqstandy Qytaı týrıstik naryǵynda ilgeriletý, vızalyq rásimderdi jeńildetý jáne eki el arasyndaǵy tikeleı áýe qatynastaryn keńeıtý boıynsha júıeli jumystyń tıimdiligin kórsetedi. 

Aıta ketelik qysqy demalysty qaıda ótkizgen tıimdi ekenin jazǵan edik.