Qytaı tsıfrlyq tólqujaty joq gýmanoıd robottardy satýǵa tyıym salmaq
ASTANA. KAZINFORM — Qytaı adamǵa uqsas (gýmanoıd) robottar úshin mindetti tsıfrlyq ıdentıfıkatsııa júıesin engizedi. Endi gýmanoıd robottar arnaıy tsıfrlyq tólqujatsyz jáne ulttyq esepke alý júıesine tirkelmeıinshe naryqqa shyǵarylmaıdy, dep habarlaıdy Sınhýa.
Qytaıda árbir gýmanoıd robotqa biregeı 29 tańbaly sáıkestendirý kody beriledi. Bul kod qurylǵynyń búkil ómirlik tsıklin — óndiristen bastap satylýy, qoldanylýy jáne joıylýyna deıin — baqylaýǵa múmkindik beredi.
Sonymen qatar Beıjińde adamǵa uqsas robottardyń ómirlik tsıklin basqarýǵa arnalǵan ulttyq platforma iske qosyldy. Jobany Qytaıdyń Ónerkásip jáne aqparattandyrý mınıstrligi janyndaǵy Standarttaý komıteti úılestiredi.
Jańa erejege sáıkes, tsıfrlyq tólqujat Qytaı ishki naryǵynda satylatyn nemese qoldanylatyn barlyq gýmanoıd robottar úshin mindetti bolady. «Kod joq — naryqqa jol joq» qaǵıdasy engizilip jatyr.
Identıfıkatsııalyq nómir tórt bólikten turady: el kody, óndirýshi kody, model kody jáne serııalyq nómir. Bul júıe qurylǵynyń shyǵý tegin, tarıhyn jáne aqaý nemese oqıǵa jaǵdaıynda jaýapty tarapty anyqtaýǵa múmkindik beredi.
Qytaı elektrotehnıkalyq standarttaý ınstıtýtynyń vıtse-prezıdenti ıÝı Sıýmınniń aıtýynsha, biryńǵaı tsıfrlyq tólqujat robottardy barlyq salada baqylaýǵa jáne qaýipsizdikti arttyrýǵa kómektesedi.
Qytaı qazirgi tańda gýmanoıd robottar óndirisi boıynsha álemdegi eń iri ortalyqtardyń biri. Elde 500-den astam kompanııa jumys isteıdi, al bul saladaǵy ónim kólemi jahandyq naryqta úlken úleske ıe.
Ónerkásiptiń qarqyndy damýy birqatar máselelerdi de anyqtady: ártúrli markırovka júıeleri, tehnıkalyq qyzmet pen jaýapkershiliktiń naqty bólinbeýi. Jańa tsıfrlyq júıe osy olqylyqtardy joıýǵa baǵyttalǵan.
Jańa talaptarǵa sáıkes, óndirýshiler aqaýy bar ónimderdi keri qaıtaryp alýǵa mindetti bolady. Sondaı-aq aqaýly robottardy qaıta satý nemese jańartý da tyıym salynbaq.
Júıe qazirdiń ózinde iske qosylǵan. 100-den astam qytaı kompanııasy platformaǵa qosylyp, 28 myńnan astam qurylǵyny tirkegen.
Buǵan deıin Qytaıda robottarǵa «tólqujat» berile bastaǵany týraly jazǵan bolatynbyz.
