Qytaı tsıfrlyq ekonomıkany qoldaýdy kúsheıtpek

ASTANA. KAZINFORM —Qytaı Halyq Respýblıkasynyń Memlekettik keńesi (úkimet) tsıfrlyq ekonomıkanyń sapaly damýyn qoldaýdyń jańa sharalaryn ázirleıtin bolady. Bul týraly Búkilqytaılyq halyq ókilderi jınalysynyń aǵymdaǵy sessııasyndaǵy úkimet baıandamasynda aıtyldy.

«Biz tsıfrlyq ekonomıkanyń sapaly damýyn qoldaý sharalaryn ázirleýge, tsıfrlyq resýrstardy ındýstrııalandyrýǵa jáne ónerkásipti tsıfrlandyrýǵa belsendi túrde járdemdesýge, tsıfrlyq tehnologııalardyń ekonomıkanyń naqty sektoryna tereń ıntegratsııalanýyna yqpal etýimiz kerek», - delingen habarlamada.

Qujatta «Jasandy ıntellekt plıýs» áreket josparyn júzege asyrý jáne halyqaralyq básekege qabiletti tsıfrlyq sala klasterlerin qurý qajettiligi aıtylady.

2022 jyly Qytaıdyń tsıfrlyq ekonomıkasy 50 trıllıon ıýannan asty. Al, Qytaıdyń jalpy ishki ónimindegi tsıfrlyq ekonomıkanyń úlesi 40 paıyzdan asty.

«Eki sessııa» aıasynda Qytaıdyń birqatar provıntsııalarynan kelgen delegatsııalar el aımaqtarynyń tsıfrlyq ekonomıkasyn odan ári damytý máselesin kóterdi. Qytaıdyń tsıfrlyq ekonomıkany damytýdaǵy kóshbasshylarynyń biri — Shyǵys Qytaıdyń Shandýn provıntsııasy. 2023 jyldyń sońynda bul provıntsııanyń JІÓ-degi tsıfrlyq ekonomıkanyń úlesi 47%-dan asty, jergilikti bılik 2025 jylǵa qaraı onyń úlesin 50%-dan asyrýdy josparlap otyr. Búgingi kúni Shandýn provıntsııasynda aımaqtyń barlyq qalalary men aýyldaryn qamtıtyn 200 myńnan astam 5G bazalyq stantsııalary ornalastyryldy.

2023 jyldyń sońynda 100 mıllıonnan astam halqy bar Shandýn provıntsııasynyń jalpy ishki ónimi 9,21 trıllıon ıýandy (1,28 trıllıon dollar) qurady.

Esterińizge sala keteıik, Beıjińde 14-shi Búkilqytaılyq halyq ókilderi jınalysynyń 2-sessııasy ótip jatyr, ol 11 naýryzda aıaqtalady.