Qytaı tranzıti arqyly Qazaqstan ekonomıkasyna 263 mlrd teńge qarajat túspek
Bıyl 9 aıda avtokólikpen 5.5 mln tonna júk tasymaldandy. Bul týraly Úkimet otyrysynda Kólik vıtse-mınıstri Sátjan Ablalıev aıtty, dep habarlaıdy Kazinform.
«Avtokólik tasymaly – el ekonomıkasynyń turaqty damýyna ózindik septigin tıgizetin basty salalardyń biri. Elimizde alys shetelderge júk tasymaldaıtyn 370 otandyq kompanııa 7 myń 6 júz avtokólikpen jumys isteıdi. Tasymaldardy Úkimetaralyq kelisimder aıasynda 42 el júzege asyrady. Olardyń negizinde jyl saıyn 170 myńǵa jýyq ruqsat berý blankileri almastyrylady. Bıyl 9 aıdyń qorytyndysy boıynsha júk tasymaly 5,5 mln tonnany qurady. Bul ótken jylmen salystyrǵanda 22 paıyzǵa artyp otyr. Tasymaldaǵy otandyq operatorlardyń úlesi 42 paıyzdy quraıdy», - dedi vıtse-mınıstr.
Onyń atap ótýinshe, tranzıttik tasymaldarda da oń úrdis baıqalady. Ótken jylmen salystyrǵanda ondaǵy ósim 44 paıyz deńgeıinde. Negizgi júk kólemi Qytaı eline tıesili jáne ol sońǵy jyldary 2 esege ósti.
«Sonymen qatar, saraptamalyq málimetterge sáıkes Qytaıdan Eýropaǵa jyl saıyn teńiz jolymen 1 mlrd 600 mln tonnaǵa deıin júk tasymaldanady. Óz kezeginde elimiz arqyly avtokólikpen tasylatyn tranzıttik júk kólemi 1 paıyzdan aspaıdy. Álemdik tájirıbede tez búlinetin, medıtsınalyq, qymbat jáne qysqa merzimde jetkizýdi talap etetin taýarlar negizinen avtokólikpen tasymaldanady. Sondyqtan, Qytaıdan Eýropaǵa baratyn júkterdiń el aýmaǵy arqyly tranzıtpen ótý kólemin ulǵaıtýdyń úlken áleýeti bar», - dedi ol.
Vıtse-mınıstrdiń atap ótýinshe, aldaǵy ýaqytta jyl saıynǵy tasymal kólemi ósimniń saqtalýy kútiledi. 2029 jylǵa qaraı tranzıttik tasymaldar kólemi 5 esege artyp, 1 mln tonnany quraıdy degen boljam bar. Buǵan, bıylǵy jyly engizilgen vızasyz rejım jáne Qytaı men Qazaqstan aýmaǵy arqyly ótetin erkin tranzıtke múmkindik bergen jańa kelisim yqpal etedi.
«Budan basqa, Qytaı tarapy TIR Carnet Eýropalyq jeńildetilgen shekaradan ótý júıesiniń múshesi bolyp qabyldandy. Ol kedendik tekserýsiz tranzıttik jol júrýge múmkindik beredi. Óz kezeginde Qytaı tranzıtiniń boljanyp otyrǵan 3 esege ulǵaıýy jyl saıyn Qazaqstan ekonomıkasyna 263 mlrd teńgege jýyq qarajat túsýdi qamtamasyz ete alady», - dedi Sátjan Ablalıev.
