Qytaı Tramptyń Beıjińge saparyn rastady: AQSh pen Qytaı kóshbasshylary neni talqylaıdy
ASTANA. KAZINFORM — Beıjińde 13-15 mamyr kúnderi Qytaı tóraǵasy Sı Tszınpın men AQSh prezıdenti Donald Tramp kelissózder júrgizedi, dep habarlaıdy Sınhýa.
Taraptar jahandyq saýdany, turaqtylyq máselelerin jáne álemdegi eń iri eki ekonomıkalyq derjava arasyndaǵy kelispeýshilikterdi talqylaýǵa nıetti.
Tramptyń Qytaıǵa aldaǵy sapary onyń sońǵy on jyldaǵy alǵash ret osy elge barýy bolmaq.
Qytaı Syrtqy ister mınıstrliginiń baspasóz hatshysy Go Tszıakýnnyń aıtýynsha, eki kóshbasshy Qytaı-AQSh qarym-qatynasynyń negizgi máseleleri boıynsha pikir almasý ótkizedi, sondaı-aq beıbitshilik pen jahandyq damýdy talqylaıdy.
Tramppen birge Qytaıǵa AQSh-tyń iri korporatsııalarynyń basshylary, sonyń ishinde Boeing, Citigroup jáne Qualcomm barýy múmkin.
Kelissózder eki el arasyndaǵy shıelenisken saýda qarym-qatynasy aıasynda ótetini atap ótildi. 2025 jyldyń kókteminde Tramp ákimshiligi birneshe elge jappaı ımporttyq baj salyǵyn jarııalady, bul AQSh pen Qytaı arasyndaǵy saýda shıelenisteriniń jańa tolqynyn týdyrdy.
Oǵan jaýap retinde taraptar ózara tarıfterdi 100%-dan astam deńgeıde engizgen, al ótken jyldyń qazan aıynda Ońtústik Koreıanyń Pýsan qalasynda memleket basshylary kezdeskennen keıin keıbir shekteýler ýaqytsha toqtatylǵan bolatyn.
Aldaǵy kelissózder eki el arasyndaǵy saýda bitiminiń saqtalýy úshin sheshýshi synaq retinde qarastyrylady.
Aıta keteıik, Donald Tramp sáýir aıyna josparlanǵan Qytaıǵa saparyn Taıaý Shyǵystaǵy jaǵdaıǵa baılanysty keıinge qaldyrǵan bolatyn.
