Qytaı Tramp ákimshiligin ózara tarıfterden tolyqtaı bas tartýǵa shaqyrdy
ASTANA. KAZINFORM – Qytaı Saýda mınıstrligi AQSh-tyń smartfon sekildi keı ónimderdi jahandyq ózara baj salyǵynan bosatý týraly sheshimine qatysty pikir bildirdi.
AQSh prezıdenti Donald Tramp shyǵys jaǵalaý ýaqytymen 12 sáýir kúni kompıýterlerdiń, smartfondardyń, jartylaı ótkizgish óndirisine arnalǵan qurylǵylardyń jáne ıntegraldyq tizbekterdiń ózara tarıfter saıasaty boıynsha engizilgen baj salyǵynan bosatylǵanyn málimdedi.
Osyǵan baılanysty QHR Saýda mınıstrliginiń resmı saıty 13 sáýir kúni málimdeme jarııalady.
Málimdemede AQSh bıliginiń saýda seriktesterine joǵary tarıfter engizý týraly sheshiminiń oryndalýyn 90 kúnge kidirtkennen keıin, tıisti saıasatqa ekinshi márte túzetý engizip otyrǵany atap kórsetildi.
- Anyǵynda, bul – AQSh-tyń birjaqty ózara tarıfter saıasatynyń qateligin túzetý jolynda jasaǵan bolmashy ǵana qadamy, - delindi málimdemede.
Mınıstrlik AQSh-tyń ákimshilik jarlyq arqyly ózara tarıfter engizýin synǵa aldy.
- Bul áreket ekonomıka men naryq zańdaryna qaıshy jáne memleketter arasyndaǵy ózara paıdaly yntymaqtastyq pen suranys-usynys qatynastaryn eskermeý bolyp sanalady. Ózara tarıfter AQSh-tyń ishki problemasyn sheshe alǵan joq, kerisinshe, halyqaralyq saýda tártibin óreskel buzyp, kásiporyndardyń óndirisi men halyqtyń turmysyna keri áser etti. Bul – ózgege zııan, ózine de jaqsy emes, – delingen málimdemede.
Málimdemede Qytaıdyń taraptar arasyndaǵy saýda qatynastary týraly ustanymynyń árqashan dáıekti ekeni atap kórsetildi. Qytaı tarapy AQSh-ty halyqaralyq qaýymdastyq pen eldegi sala ókilderiniń ustamdy úndeýlerine qulaq asyp, óz qateligin túzetý jolynda naqty ári úlken qadam jasap, ózara tarıfter týraly aǵat sheshimnen tolyqtaı bas tartýǵa jáne kelispeýshilikterdi sheshýdiń ózara qurmet pen teń quqyly dıalogqa negizdelgen durys jolyna oralýǵa shaqyrdy.
Buǵan deıin Tramp ákimshiliginiń smartfondar, kompıýterler jáne basqa da elektronıka jahandyq ózara baj salyǵynan bosatylatynyn málimdegeni týraly habarlaǵan edik.