Qytaı teńiz sýynan ýran men sırek mıneraldar óndirýdi josparlap otyr
ASTANA. KAZINFORM – Qytaıdyń Tabıǵı resýrstar mınıstrligi teńiz sýyn paıdalaný salasyndaǵy eldiń jańa jetistikteri týraly baıandamany jarııalady, dep habarlaıdy Sınhýa agenttigi.
Qujatta teńizde erigen strategııalyq mıneraldardyń orasan zor qory jáne olardy ozyq tehnologııalar arqyly óndirýdi keńeıtý josparlary da qamtylǵan.
Baıandamaǵa sáıkes, Qytaı alǵash ret naqty teńiz jaǵdaıynda kılogrammmen ólshenetin kólemde ýran óndirýge qol jetkizdi.
Qytaılyq ǵylymı-zertteý ınstıtýttary, ýnıversıtetter men kásiporyndar teńiz sýynan lıtıı, ýran, deıterıı jáne basqa da sırek elementterdi bólip alý salasyndaǵy irgeli teorııalar men negizgi tehnologııalar boıynsha da eleýli jetistikterge jetken.
Álemdik muhıttaǵy ýran qory shamamen 4,5 mıllıard tonnaǵa baǵalanady. Bul qurlyqtaǵy belgili qorlardan myń eseden astam kóp.
Tıantszındegi Teńiz sýyn tushylandyrý jáne keshendi paıdalaný ınstıtýtynyń dırektory Sıan Vensıniń aıtýynsha, qazirgi ýaqytta Qytaıda jalpy qýaty táýligine 3,077 mıllıon tonna bolatyn 167 tushylandyrý qondyrǵysy jumys isteıdi.
Sonymen qatar ónerkásiptik salqyndatý úshin paıdalanylatyn teńiz sýynyń jyldyq kólemi 193,36 mıllıard tonnaǵa jetken. Bul 2020 jylmen salystyrǵanda 86,4 paıyzǵa joǵary.
2026–2030 jyldarǵa arnalǵan 15-besjyldyq jospar aıasynda Qytaı tıisti tehnologııalar men jabdyqtardy ázirleýdi jalǵastyryp, teńiz sýynan strategııalyq elementterdi ónerkásiptik kólemde óndirýge qajetti tehnologııalyq bazany qalyptastyrýdy kózdep otyr.
Aıta keteıik, Qytaıda 6G baılanysyna arnalǵan chıpterdiń jappaı óndirisi iske qosylǵanyn jazdyq.
