Qytaı tájirıbesi Qazaqstanǵa qala men aýyl mektepteri arasyndaǵy tsıfrlyq teńsizdikti eńserýge kómektesedi
ASTANA. KAZINFORM — Tamyz aıynan bastap 500 mektepte jasandy ıntellektini pılottyq túrde engizý bastalady. Bul týraly Qazaqstan Prezıdentiniń kómekshisi Qýanyshbek Esekeev Jibek Joly telearnasyndaǵy «Ýáde» baǵdarlamasynda málimdedi.
Spıkerdiń aıtýynsha, Memleket basshysy dástúrli túrde tehnologııa salasyndaǵy bilim berý baǵdarlamalaryna aıryqsha kóńil bóledi. Prezıdenttiń iri bastamalarynyń biri — joǵary bilim berý júıesine JI quraldaryn úıretý baǵdarlamalaryn engizý. Bul baǵdarlama ekinshi jyl qatarynan jumys istep keledi jáne JI-men jumys isteý daǵdylaryn shamamen 600 myń stýdent meńgerdi.
— Budan bólek, Prezıdent jeke JI ýnıversıteti qurylatynyn jarııalady. Qyrkúıek aıynan bastap ol jasandy ıntellekt salasyna mamandar daıarlaıtyn tolyqqandy baǵdarlamamen jumysyn bastaıdy, — dedi Qýanyshbek Esekeev.
Jasandy ıntellektini orta bilim berý júıesine engizý de mańyzdy baǵyttardyń biri bolyp otyr. Spıkerdiń pikirinshe, mundaǵy eń basty kedergi — aýyl men qala mektepteri arasyndaǵy tsıfrlyq alshaqtyq.
Bul máseleni sheshý úshin Qazaqstan Qytaı tájirıbesin paıdalanýdy josparlap otyr. Jasandy ıntellektini damytý jónindegi keńestiń múshesi Lı Kaı-Fý Qytaıdyń birqatar óńirinde qoldanylyp jatqan ádistemelerdi tanystyrdy. Qazaqstan osy tájirıbelerdi beıimdep, keń aýqymda engizýdi kózdep otyr.
1 shildege deıin mektepterge jasandy ıntellektini engizýdiń eki jylǵa arnalǵan, 2029 jylǵa deıingi keshendi josparyn ázirleý josparlanǵan. Alǵashqy pılottyq joba 1 tamyzda bastalady: 500 mektep bilim berý protsesine jasandy ıntellekt júıelerin belsendi túrde engize bastaıdy. Bul úshin aqparattyq júıe ǵana emes, synyptardy tehnologııalyq jabdyqtaý da mańyzdy.
— Ádistemeniń negizgi maqsaty — muǵalimdi almastyrý emes, onyń jumysyn tolyqtyryp, bilim berý sapasyn arttyrý. Baǵdarlama árbir oqýshyǵa jetýi qajet. Osy maqsatta tek oqý protsesine arnalǵan planshetter nemese arnaıy gadjetter sekildi jeke qurylǵylardy paıdalaný usynylady, — dep atap ótti Prezıdent kómekshisi.
Aıta keteıik, Qazaqstan men Túrkııa prezıdentteri Alem.ai halyqaralyq jasandy ıntellekt ortalyǵyna bardy.
