Qytaı tájik-aýǵan shekarasyndaǵy baqylaýdy kúsheıtýge shaqyrdy
ASTANA.KAZINFORM - Nıý-Iorkte ótken BUU Qaýipsizdik Keńesiniń otyrysynda Qytaı elshisi Fý Kýng tájik-aýǵan shekarasyndaǵy jaǵdaıdyń ýshyǵýyn, nátıjesinde 10 qytaı azamatynyń jaraqat alýy máselesin kóterdi, dep habarlaıdy Kazinform agenttiginiń menshikti tilshisi.
Afghanistan International habarlaýynsha, qytaılyq dıplomat óz sózinde Aýǵanstan aýmaǵynan shyqqan shabýyldar kezinde qytaılyq azamattardyń qaza tabýyn aıyptady. Ol Talıban úkimetin bul oqıǵalardy muqııat tergeýge shaqyrdy.
Fý Kýng tájik-aýǵan shekarasyndaǵy baqylaýdy kúsheıtýdi usyndy. Dıplomat Beıjiń aımaq elderimen úılestirý tetikterin nyǵaıtý jáne qaýipsizdikti qamtamasyz etý úshin yntymaqtastyq jasaýǵa daıyn ekenin atap ótti.
Buǵan deıin Tájikstan basshysy Aýǵanstanmen shekarada qaýipsizdikti kúsheıtýdi buıyrǵany habarlanǵan bolatyn.
Eske sala keteıik, 26 jáne 30 qarashada tájik shekara aımaǵynda aýǵan tarapynan jasalǵan qarýly shabýyldar kezinde bes qytaılyq jumysshy qaza taýyp, beseýi jaralanǵan edi.