Qytaı Tax Free júıesi bar alǵashqy onlaın-dúkendi iske qosty
ASTANA.KAZINFORM — Beıjińde sheteldik týrısterge salyqty qaıtarý múmkindigi qarastyrylǵan eldegi alǵashqy tsıfrlyq dúken ashyldy, dep habarlaıdy China Daily.
Joba Qytaıdyń iri elektrondyq saýda platformalarynyń biri – JD.com bazasynda júzege asyryldy. Bastama sheteldik qonaqtar úshin salyq qaıtarý rásimin jeńildetýge jáne ishki tutynýdy yntalandyrýǵa baǵyttalǵan.
Marketpleıske biriktirilgen servıs protsesti barynsha avtomattandyrǵan. Satyp alýshyǵa tek «departure tax refund» belgisi bar taýardy tańdap, tólqujat derekteri men Qytaıǵa kirgen kúnin kórsetý jetkilikti. Osydan keıin júıe salyqty qaıtarýǵa arnalǵan elektrondyq ótinimdi avtomatty túrde rásimdeıdi.
Onlaın-dúken assortımentinde alty negizgi sanat boıynsha shamamen 300 taýarlyq kishi sanat bar. Olardyń qatarynda uıaly baılanys quraldary, tsıfrlyq jáne turmystyq tehnıka, kompıýterler, sondaı-aq keńse taýarlary usynylǵan.
JD kompanııasy baǵdarlama aıasyndaǵy taýar túrlerin keńeıtýdi josparlap otyr. Bul rette jergilikti óndiristiń sapaly ónimderine, joǵary tehnologııalyq taýarlarǵa, dástúrli brendterge jáne Qytaıdyń mádenı murasy negizinde jasalǵan kádesyılarǵa basymdyq berilmek.
Buǵan deıin Qytaıdyń sheteldik týrıster úshin Tax Free júıesin jeńildetip jatqany habarlanǵan bolatyn.
