Qytaı taýlaryndaǵy ǵylymı ekspedıtsııaǵa alǵash ret robot-ıt qatysty
ASTANA. KAZINFORM — Qytaılyq kompanııa jasap shyǵarǵan robot-ıt eldiń ońtústik-batysyndaǵy ıÝnnan provıntsııasynda ornalasqan Aılaoshan taýlarynyń ormandaryndaǵy bıoalýantúrlilikti zertteýge arnalǵan ǵylymı ekspedıtsııaǵa qatysty, dep jazady BelTA.
Bul — jasandy ıntellekti (JI) naqty qurylǵyǵa engizilgen robottyń tabıǵı ortadaǵy ǵylymı zertteýlerge alǵash ret qatysýy.
Ekspedıtsııaǵa qatysýshylar dońǵalaqtary men júrýge arnalǵan aıaqtary bar robotty qalyń ormandarda, tik betkeılerde jáne adamdardyń jetýi qıyn nemese qaýipti basqa da jerlerde paıdalandy. Robot-ıt zertteý baǵyttaryn tekserip, foto jáne beınetúsirilim júrgizdi, sondaı-aq júk tasymaldady. Zertteýshilerdiń baǵalaýynsha, robotty paıdalaný qorshaǵan ortaǵa zııan tıgizbeı, derekter jınaýǵa múmkindik bergen.
Ekspedıtsııanyń mańyzdy nátıjeleriniń biri — hlorofıli joq sırek ósimdik túri, birgúldi monotropanyń (Monotropa uniflora) sátti túsirilýi. Qytaı ǵalymdarynyń aıtýynsha, túsirilgen beınekadrlar ǵylymı zertteýler úshin qundy materıal sanalady.
Robot-ıt kúrdeli jer bederinde jáne ashyq aýadaǵy qolaısyz jaǵdaılarda jumys isteýge arnalǵan. Ol shańdy ári jańbyrly aýa raıynda da jumys isteı alady. Qurylǵy –30-dan +55 gradýsqa deıingi temperatýraǵa tózimdi. Sondaı-aq salmaǵy 35 kelige deıingi júkti turaqty túrde kóterip, qýattaý qajettiliginsiz 3,5 saǵatqa deıin jumys isteıdi.
Dońǵalaqtary men aıaqtarynyń úılesimdi qurylymy robotqa tasty soqpaqtardan ótýge, tik betkeılerge kóterilýge, qalyń ósimdikter arasymen jáne laıly jerlerde qozǵalýǵa múmkindik beredi.
Aıta keteıik, bıyl Beıjińde 16 elden 2 myńnan astam robot qatysqan álemdik oıyndar ótti.
