Qytaı táýeldilik týyndatatyn dárilerge baqylaýdy kúsheıtpek
ASTANA. KAZINFORM — Qytaıdyń ortalyq vedomstvolary quramynda pregabalın, dekstrometorfan jáne gvaıfenezın bar dári-dármekterge baqylaýdy kúsheıtý týraly sheshim qabyldady, dep habarlaıdy Sınhýa.
Bul shara atalǵan preparattardyń zańsyz aınalymǵa túsýi men teris paıdalanylýyn boldyrmaýǵa baǵyttalǵan.
Qujatqa sáıkes, provıntsııalyq deńgeıdegi dári-dármekke baqylaý organdary dekstrometorfandy qoldanýǵa arnalǵan qajetti josparlardy bekitýdi qatań túrde qadaǵalaıdy. Dekstrometorfan — gvaıfenezın preparattary men dekstrometorfan gıdrobromıdi negizindegi jótelge qarsy qospalardyń belsendi farmatsevtıkalyq ıngredıenti bolyp esepteledi.
Qytaıdyń Dári-dármekke qadaǵalaý jónindegi memlekettik basqarmasy, Qoǵamdyq qaýipsizdik mınıstrligi jáne Nashaqorlyqqa qarsy memlekettik komıteti birlesip shyǵarǵan tsırkýlıarda bul preparattardy qolma-qol aqshaǵa satyp alýǵa, onlaın saýda arqyly alýǵa jáne kámeletke tolmaǵandarǵa satýǵa tyıym salynatyny kórsetilgen.
Sonymen qatar, óndirýshi kompanııalar dárilerdi qadaǵalaý júıesin engizýge mindettelse, dıstrıbıýtorlar satyp alý jáne tekserý kezinde olardyń qozǵalysyn baqylaýǵa tıis.
Qujatta bul eki toptaǵy dárilerdi teris paıdalaný qaýpi joǵary negizgi sanat retinde baqylaýǵa alý jáne zańsyz aınalymmen qatań kúresý kózdelgeni aıtylǵan.
Osyǵan deıin Qytaıda benzın men dızel otynynyń bólshek baǵasy tómendetiletini aıtyldy.
