Qytaı taýarlaryna 50% qosymsha baj salyǵy engiziledi — Tramp
ASTANA. KAZINFORM — AQSh Prezıdenti Donald Tramp Qytaı AQSh taýarlaryna salynǵan 34% baj salyǵyn alyp tastamasa, 9 sáýirden bastap Qytaıdan ákelinetin ónimderge 50% qosymsha baj salyǵyn engizetinin málimdedi.
Bul týraly Lianhe Zaobao basylymy habarlady.
— Eger Qytaı 8 sáýirge deıin 34% baj salyǵyn alyp tastamasa, onda AQSh 9 sáýirden bastap Qytaı taýarlaryna 50% qosymsha baj salyǵyn engizedi, — dep jazdy Tramp 7 sáýir kúni Truth Social áleýmettik jelisinde.
Ol sondaı-aq Qytaı tarapynyń AQSh-pen kelissóz júrgizýdi ótinýine baılanysty kezdesýlerdiń tolyqtaı toqtatylatynyn málimdedi.
Aqpan aıynan beri AQSh pen Qytaı arasyndaǵy saýda qaqtyǵysy ýshyǵyp keledi. Tramp ákimshiligi 4 aqpanda Qytaıdan ákelinetin barlyq taýarǵa 10% baj salyǵyn engizdi, 4 naýryzda bul mólsherlemeni 20%-ǵa deıin kóterdi. Al sońǵy ret 9 sáýirden bastap taǵy da qosymsha 34% baj salyǵy engiziletini belgili boldy. Eger buǵan Tramp bılikke kelgenge deıin qoldanylǵan 13% ortasha baj salyǵyn qosar bolsaq, Qytaıdan AQSh-qa eksporttalatyn ónimderge salynatyn baj salyǵynyń jalpy mólsherlemesi 67%-ǵa jetedi.
Buǵan qarymta retinde Qytaı 10 aqpannan bastap AQSh-tan ákelinetin kómir jáne suıytylǵan gazǵa 15%, shıki munaı, aýylsharýashylyq tehnıkasy, úlken lıtrajdy avtokólikter men pıkaptarǵa 10% baj salyǵyn sala bastady. Al 10 naýryzdan bastap AQSh-tan ımporttalatyn taýyq eti, júgeri jáne maqta sekildi ónimderge 10%-15% aralyǵynda qosymsha baj salyǵyn engizdi. Josparǵa sáıkes, 10 sáýirden bastap AQSh-tan ákelinetin barlyq taýarǵa 34% qosymsha baj salyǵy engizilýge tıis.
Budan tys, Qytaı tarıftik emes sharalardy da qolǵa aldy. Mysaly, Google, NVIDIA jáne Qytaıda jumys isteıtin jekelegen amerıkalyq kompanııalarǵa monopolııaǵa qarsy tekserý júrgizý, birqatar amerıkalyq kásiporyndy eksporttan shettetý jáne «senimsiz sýbektiler tizimine» engizý, t. b. Sonymen qatar Qytaı AQSh-tan aǵash jáne aýylsharýashylyq ónimderiniń keı túrin ımporttaýǵa lıtsenzııa berýdi toqtatty jáne sırek jer metaldary sekildi strategııalyq resýrstardyń eksportyna shekteý qoıdy.