Qytaı taýarlaryn Qazaqstan arqyly ótkizýge jańa temirjol salý kerek - ekonomıst

ASTANA. KAZINFORM – Qytaı taýarlaryn Qazaqstan arqyly tranzıtpen ótkizý úshin tar tabandy jańa temirjoldy salý kerek. Bul týraly Kazinform agenttiginiń BIZDIÑ ORTA podkasynda ekonomıst, táýelsiz sarapshy Erlan Karımov málim etti.

- Іri ınfraqurylymdyq jobalardy qoldaý kerek. Meniń oıymsha, Qazaqstandy alǵa súıreıtin ekonomıkalyq baǵyttardy birinshi kezekte qarjylandyrýymyz kerek... Qazaqstan arqyly tranzıtpen Qytaı taýarlary ótedi. Qytaılyqtar ózderiniń taýarlaryn ótkizýge basymdyq berýdi surap otyr. Bul rette, tıisti usynystardy únemi aıtyp kelemin. Nege biz Qytaı jaǵymen birlesip, Qorǵastan Quryq portyna deıin tar tabandy temirjol salmaımyz? Óıtkeni, Qytaı Qyrǵyzstan, Ózbekstan, Túrikmenstan sekildi bes memleket arqyly ótetin temirjol salmaqshy. Bul jobaǵa shamamen 5 mlrd AQSh dollar qarajat bóledi. Degenmen, osy 5 eldiń shekarasynan ótýge ýaqyt kerek, sondaı-aq taýly jerlerge úńgirjol salý shyǵyndary bar.

Al Qazaqstannyń jazyq dalasy arqyly jol salý jeńil bolady, - dedi E. Karımov.

Onyń paıymynsha, qytaılyq taýarlardy elimiz arqyly ótkizýge tar tabandy temirjol salynsa, Qazaqstannyń tranzıttik áleýeti edáýir artady. 

- Elimiz arqyly bir kúnde ótetindeı salýǵa bolady. Máselen, Qytaıda tar tabandy, al bizde keń tabandy temirjol paıdalanylyp keledi. Bizdiń shekaraǵa kelgen kezde, olar tabandaryn aýystyrady. Buǵan - ýaqyt kerek. Bıznestiń damýy úshin taýardyń sapasy, taýar baǵasy jáne ony jetkizý jyldamdyǵy sııaqty úsh talapty oryndaý qajet. Qytaıda taýar sapary jaqsaryp jatqanyn kórip otyrmyz jáne baǵasy da óte qolaıly. Qazir olarǵa jetkizý jyldamdyǵy jetispeı otyr. Eger olarǵa tar tabandy joldy usyna alsaq, bizdiń logıstıkalyq áleýtemiz artady. Sondyqtan osy jobany júzege asyrýda Qazaqstannyń barlyq múmkindigi bar, - dedi sarapshy.

Aıta keteıik, Qytaı alǵashqy tórt aıda 1,4 trıllıon dollar quraıtyn jańa nesıe berdi.