Qytaı taýarlaryn AQSh baj salyǵyn aınalyp ótý úshin Ońtústik Koreıa ónimi retinde kórsetip jatyr

ASTANA.KAZINFORM — Ońtústik Koreıa sheteldik, ásirese Qytaıdan kelgen taýarlardy koreıalyq eksport retinde kórsetýge tyrysatyn áreketterdiń kóbeıgenin tirkedi. Bul AQSh prezıdenti Donald Tramp engizgen baj salyǵyn aınalyp ótý maqsatynda jasalǵan, dep habarlaıdy Reuters.

Ońtústik Koreıanyń Keden qyzmeti dereginshe, birinshi toqsan qorytyndysy boıynsha shyqqan elin kórsetý erejelerin buzý faktileri 29,5 mıllıard vonǵa (20,81 mıllıon AQSh dollary) jetken. Bul buzýshylyqtardyń 97 paıyzy AQSh-qa baǵyttalǵan jetkizilimderge qatysty.

Salystyrmaly túrde aıtsaq, 2024 jyly mundaı buzýshylyqtar 34,8 mıllıard vondy quraǵan, onyń 62 paıyzy AQSh naryǵyna baǵyttalǵan.

Keden qyzmetiniń tergeý josparlaý bóliminiń dırektory Lı Kvan Ýdyń aıtýynsha, Tramptyń alǵashqy prezıdenttik merzimi kezinde de mundaı zańbuzýshylyqtar jıilegen bolatyn.

Táýekelderdiń artqanyn eskergen bılik bul joly tergeýdi aldyn ala júrgizip, zańsyz eksporttyń aldyn alýǵa tyrysqan. Lı atap ótkendeı, birinshi toqsannyń ózinde AQSh baj salyǵyn aınalyp ótýge áreket jasalǵany baıqalǵan.

Tekserý nátıjesi boıynsha, akkýmýlıatorlarǵa arnalǵan katod materıaldary 3,3 mıllıard von somasyna Qytaıdan ákelinip, Ońtústik Koreıa ónimderi retinde AQSh-qa jóneltilgen.

Sondaı-aq, naýryz aıynda Qytaıdan beınebaqylaý kameralary bólshektep ákelinip, Ońtústik Koreıada qaıta qurastyrylyp, 19,3 mıllıard von kóleminde eksporttalǵan.

Ońtústik Koreıanyń Keden qyzmeti mundaı shemalardyń jolyn kesý úshin arnaıy jumys tobyn qurdy jáne jergilikti kompanııalardy qorǵaýǵa arnalǵan naqty áreket sharalaryn ázirleýdi josparlap otyr.

Aıta keteıik, Qytaı AQSh-tan suıytylǵan tabıǵı gaz satyp alýdy toqtatty.