Otandyq óndirýshilerge qoldaý: halyqaralyq sertıfıkattaýǵa ótemaqy kólemi ulǵaıdy
ASTANA. KAZINFORM — Energetıka mınıstrligi qazaqstandyq óndirýshilerdiń halyqaralyq naryqqa shyǵýyn jeńildetti.
Energetıka mınıstrligi men «Munaı-gaz mashına jasaý salasyn damytýǵa arnalǵan halyqaralyq ortalyq» ZTB birlesip, Qazaqstandaǵy iri halyqaralyq munaı-gaz jobalarynda taýarlar men qyzmetterdegi jergilikti qamtý úlesin arttyrý boıynsha júıeli jumysty jalǵastyryp keledi. Osy baǵytta ishki naryqta otandyq taýarlar, jumystar jáne qyzmetterdi ilgeriletýge baǵyttalǵan memlekettik qoldaý sharalarynyń qaǵıdalaryna ózgerister engizildi.
— Endi otandyq óndirýshilerdiń halyqaralyq sertıfıkattaýdan ótýdi óteý shegi 3000 AEK-ten 15 000 AEK-ke deıin ulǵaıtyldy. Baǵdarlamanyń jalpy bıýdjeti 2 mlrd teńgeden asady. Bul sharalar shyǵyndardy 60 mln teńgege deıin óteýge múmkindik beredi. Bul óz kezeginde bızneske túsetin qarjylyq júktemeni azaıtyp, halyqaralyq sertıfıkattaýdan ótýge qatysty táýekelderdi aıtarlyqtaı tómendetedi. Al qajetti sertıfıkattardy alý qazaqstandyq óndirýshilerdiń munaı-gaz operatorlarynyń satyp alýlaryna qatysý múmkindikterin keńeıtedi. Sonymen qatar, bul eksporttyq áleýetti arttyryp, ımportqa táýeldilikti azaıtýǵa yqpal etedi, — delingen habarlamada.
Budan buryn Energetıka mınıstrligi benzın men gaz baǵasyna qatysty shaǵymdardy qabyldaıtyn jeli ashqany anyqtaldy.