Qytaı tabıǵı apattan zardap shekkenderge 142 mıllıon dollar bóldi

ASTANA. KAZINFORM – Qytaı tabıǵı apattan zardap shekken aımaqtarǵa kómek kórsetý úshin 1,015 mıllıard ıýan (shamamen 142 mıllıon dollar) bóldi, dep habarlaıdy Kazinform Sınhýa agenttigine silteme jasap. 

Qytaı Halyq Respýblıkasy Qarjy mınıstrliginiń habarlaýynsha, qarjy Aýyl sharýashylyǵy jáne aýyl isteri mınıstrligimen, sondaı-aq Sý resýrstary mınıstrligimen birlesip bólingen. 

Qarjy ártúrli maqsattarǵa bólinedi. Qarajattyń bir bóligi Beıjiń, Hebeı, Іshki Mońǵolııa, Gýandýn jáne basqa da aımaqtardaǵy sý tasqynynyń zardaptaryn joıýǵa jumsalady. Kómek egindi qaıta egýge jáne zaqymdalǵan ınfraqurylymdy qalpyna keltirýge sýbsıdııalardy qamtıdy. 

Qarjynyń taǵy bir bóligi Shandýn, Henan, Hýbeı provıntsııalaryndaǵy jáne basqa aımaqtardaǵy qurǵaqshylyqpen kúresýge arnalǵan. Qoldaý topyraqty tyńaıtý, kóshetterdi saqtaý, sýarý jáne uńǵymalardy burǵylaý sııaqty is-sharalardy qamtıdy. 

Eske salaıyq, tamyz aıynda jergilikti bılik Beıjiń, Tıantszın, Hebeı jáne Gýandýn provıntsııalarynda sý tasqynyna qarsy áreket etý deńgeıin arttyrǵan bolatyn. Qytaı astanasynda 82 myńnan astam azamat evakýatsııalandy. Gýandýn provıntsııasynda tolassyz jaýǵan jańbyr saldarynan taý kóshkininen 7 adam iz-túzsiz joǵalyp ketti. 

Eske salsaq, buǵan deıin Qytaı qorshaǵan ortany saýyqtyrýdyń bes jyldyq josparyn jarııalaǵanyn jazǵan edik.