Qytaı sý tasqynynan zardap shekken óńirine qosymsha gýmanıtarlyq kómek jiberdi
ASTANA. KAZINFORM — Qytaı Gýansı-Chjýan avtonomııalyq aýdanyndaǵy tabıǵı apattan zardap shekkenderge qosymsha gýmanıtarlyq kómek bóldi, dep habarlaıdy Sınhýa.
Qytaı Gýansı-Chjýan avtonomııalyq aýdanynda (GChAA) bolǵan tabıǵı apattarǵa baılanysty 36 myńnan astam qosymsha tótenshe jaǵdaıǵa arnalǵan kómek quralyn bóldi. Bul týraly seısenbi kúni QHR Tótenshe jaǵdaılardy basqarý mınıstrligi habarlady.
Bólingen kómek quramyna toqylǵan qaptar men rezeńke qaıyqtar kiredi. Bul quraldar Qytaıdyń Sý tasqyny men qurǵaqshylyqqa qarsy kúres jónindegi memlekettik shtaby jáne Memlekettik azyq-túlik jáne materıaldyq rezervter basqarmasy tarapynan birlesip jiberildi.
Memlekettik organdar men qoǵamdyq uıymdardyń jedel qamtamasyz etý tetigi aıasynda GChAA-ǵa azyq-túlik, jaryqtandyrý jabdyqtary, jańbyr plaştary, sý ótkizbeıtin aıaq kıimder men ylǵalǵa tózimdi tósenishterdi qosa alǵanda taǵy 40 myńǵa jýyq kómek quraly jetkizildi. Buǵan deıin ortalyq tabıǵı apattar qorynan bólingen 160 myń kómek quraly da zardap shekken aýdandarǵa jetkizilgen.
Qytaıdyń Sý tasqyny men qurǵaqshylyqqa qarsy kúres jónindegi memlekettik shtaby GChAA-daǵy sý tasqynyna baılanysty tótenshe jaǵdaı rejıminiń 2-deńgeıin uzartty. Tabıǵı apattardyń saldaryn boldyrmaý jáne azaıtý jónindegi memlekettik komıtet 4-deńgeıdegi tótenshe jaǵdaı rejımin, al QHR Tótenshe jaǵdaılardy basqarý mınıstrligi geologııalyq sıpattaǵy yqtımal apattarǵa baılanysty 3-deńgeıdegi ulttyq tótenshe jaǵdaı rejımin uzartty.
Qytaıda tótenshe jaǵdaılarǵa den qoıýdyń tórt deńgeıli júıesi qoldanylady. Onyń ishinde 1-deńgeı — eń joǵary qaýip deńgeıi bolyp sanalady.
Seısenbi keshindegi málimet boıynsha, nóser jaýyn saldarynan bolǵan sý tasqynynan Gýansı-Chjýan avtonomııalyq aýdanynda 6 adam qaza taýyp, 11 adam iz-túzsiz joǵalǵan.
Aıta keteıik, «Maısak» taıfýnynan týyndaǵan nóser jańbyr Gýansı-Chjýan avtonomııalyq aýdanyndaǵy 375 myń turǵynǵa áser etken. Zardap shekken óńirlerden 130 myń adam evakýatsııalandy.
