Qytaı sý tasqynynan zardap shekkenderge kómek retinde 180 mln ıýan bóldi
ASTANA. KAZINFORM – Qytaı eldiń alty provıntsııasynda sý tasqynymen kúresý jáne taıfýn saldaryn joıý úshin TJ janyndaǵy ortalyq kómek qorynan 180 mln ıýan (26,5 mln dollar) bóldi, dep habarlaıdy Sınhýa aqparat agenttigi.
Basylymnyń málimetinshe, Qytaı dúısenbi kúni alty provıntsııaǵa sý tasqyny men taıfýn saldaryn joıý jumystaryna qoldaý kórsetý úshin TJ kezinde ortalyq kómek qorynan shuǵyl túrde 180 mln ıýan (shamamen 26,5 mln AQSh dollar) aldyn ala qarajat bóldi.
Qarjy mınıstrligi men Tótenshe jaǵdaılar mınıstrliginen birlesip bólingen qarajat Gýandýn (ońtústik Qytaı), Fýtszıan, Tszıansı (shyǵys Qytaıda), Hýnan (ortalyq Qytaı), Lıaonın jáne Tszılın (ortalyq-shyǵys Qytaı) provıntsııalaryndaǵy sý tasqyny men taıfýnǵa qarsy tótenshe sharalar men apattyq-qutqarý jumystaryna jumsalady.
Qytaılyq vedomstvolardyń málimetinshe, qarajat negizinen izdeý-qutqarý jumystaryn júrgizýge, zardap shekken halyqty evakýatsııalaý jáne ornalastyrýǵa, tótenshe jaǵdaılardaǵy qaýipti basqarýǵa, qaıtalama apattardyń qaýipterin anyqtaý jáne azaıtýǵa, sondaı-aq zaqymdalǵan jáne qıraǵan úılerdi qalpyna keltirýge jumsalady.
Sońǵy kúnderi Qytaıǵa birneshe taıfýn soqty. Olar eldiń ońtústik, shyǵys jáne soltústik-shyǵys aımaqtarynda sý tasqyny men geologııalyq apattarǵa ákeldi.
Eske salsaq, Qytaıdyń Sý resýrstary mınıstrligi «Noýl» taıfýny ákeletin nóser jaýynǵa baılanysty eldiń jeti óńirinde sý tasqynyna qarsy 4-deńgeıli tótenshe áreket etý rejımin engizdi.
