Qytaı sý tasqynyna qarsy kúreske 100 mlrd ıýan kóleminde qosymsha qarjy bóldi

ASTANA. KAZINFORM — Qytaıdyń Halyq banki tabıǵı apattardyń saldaryn joıý úshin qaıta qarjylandyrý kvotasyn 100 mlrd ıýanǵa arttyrdy, dep habarlaıdy Sınhýa.

Qytaıdyń Halyq banki (QHB) aýyl sharýashylyǵy men shaǵyn bızneske arnalǵan qaıta qarjylandyrý kvotasyn 100 mlrd ıýanǵa (shamamen 14,01 mlrd AQSh dollary) deıin kóbeıtti.

QHB seısenbi kúni habarlaǵandaı, osyndaı sheshim tabıǵı apattardan keıingi sý tasqynyna qarsy is-sharalar men qalpyna keltirý jumystaryn qoldaýǵa baǵyttalǵan.

Bul shara qarjy uıymdaryn sharýashylyq júrgizýshi sýbektilerge, ásirese mıkro jáne shaǵyn kásiporyndarǵa, jeke kásipkerlerge, aýyl sharýashylyǵy men mal sharýashylyǵy salasyndaǵy kásiporyndar men fermerlerge nesıe berý qoldaýyn kúsheıtýge yntalandyrý maqsatynda qabyldandy.

Atalǵan kómek tabıǵı apattardan zardap shekken aımaqtardy, sonyń ishinde Beıjiń, Hebeı, Tszılın, Shandýn jáne Gansý provıntsııalaryn qamtıdy.

Eldiń basty qarjylyq retteýshisi Ortalyq banktiń aımaqtyq bólimshelerin jańa qaıta qarjylandyrý kvotasyn tolyq paıdalanýǵa shaqyrdy.

Sonymen qatar, bank qarjy ınstıtýttaryn sý tasqynyna qarsy kúres pen qalpyna keltirý jumystaryna qajetti qarjylandyrýdy qamtamasyz etýge, sondaı-aq sharýashylyq sýbektileriniń qyzmeti men óndirisin jedel qalpyna keltirýge baǵyttap otyr.

Jaqynda ǵana Qytaıdyń Qarjy mınıstrligi men Tótenshe jaǵdaılardy basqarý mınıstrligi tabıǵı apattardyń saldaryn joıý úshin eldiń jeti óńirine 170 mıllıon ıýan (shamamen 23,8 mıllıon AQSh dollary) kóleminde qarjy bólgen edi.

Buǵan deıin Qytaıdyń Іshki Mońǵolııa avtonomııalyq aýdanynda kenetten taýdan aqqan tasqyn saldarynan qaza tapqandar sany 10-ǵa adamǵa jetkeni belgili boldy.

Sondaı-aq Qytaıdyń soltústik-batysyndaǵy Gansý provıntsııasynda bolǵan taý tasqyny saldarynan 15 adam opat bolyp, taǵy 28 adam iz-túzsiz joǵalǵan.