Qytaı strategııalyq paıdaly qazbalar kontrabandasymen kúresti kúsheıtedi
ASTANA. KAZINFORM — Senbi kúni Qytaı bıligi strategııalyq mańyzy bar paıdaly qazbalardyń kontrabandasyna qarsy kúres naýqanyn odan ári kúsheıtetinin málimdedi, dep habarlaıdy Sınhýa.
Bul týraly Ońtústik Qytaıdaǵy Gýansı-Chjýan avtonomııalyq aýdanynyń ákimshilik ortalyǵy Nannın qalasynda ótken jınalysta aıtyldy. Jıyndy eksporttyq baqylaý salasyndaǵy ulttyq úılestirý mehanızmi keńsesi uıymdastyrdy. Oǵan QHR Saýda mınıstrligi, Qoǵamdyq qaýipsizdik mınıstrligi, Bas keden basqarmasy jáne basqa da mekemelerdiń ókilderi qatysty.
Jıynda bul naýqan bastalǵan kúnnen bastap «nóldik tózimdilik» qaǵıdatyn basshylyqqa alyp, strategııalyq mańyzdy paıdaly qazbalardyń kontrabandasyna qarsy aýyr soqqy berip jatqany aıtyldy. Salaǵa jaýapty mekemeler zańsyz eksport derekterin tekserdi.
Alaıda, jıynǵa qatysýshylar strategııalyq paıdaly qazbalardyń zańsyz eksportymen kúrestegi jaǵdaıdyń áli de kúrdeli ekenin atap ótti, óıtkeni mundaı jaǵdaılar áli de tirkelýde jáne olardy anyqtaý barǵan saıyn qıyndap barady. Osyǵan baılanysty tıisti organdarǵa qatań tekserýlerdi saqtap, strategııalyq resýrstar men olarǵa qatysty tehnologııalardyń zańsyz syrtqa shyǵýyna jol bermeý tapsyryldy.
Kampanııany jalǵastyra otyryp, tıisti mekemeler qosarly maqsattaǵy taýarlardy eksporttyq baqylaýǵa qatysty quqyq qorǵaý organdarynyń birlesken úılestirý ortalyǵyn qurý máselesin qarastyrýy tıis. Sonymen qatar, memlekettik eksporttyq baqylaý sharalarynan jaltarǵan sheteldik tutynýshylardy eksporttyq retteý tizimine engizý usynyldy.
Sondaı-aq, eksportpen aınalysatyn kásiporyndarǵa keshendi tekserýlerdi durys júrgizý qajettiligi týraly nusqaý berý jáne olardyń ónimderiniń áskerı maqsatta nemese áskerı tutynýshylarǵa zańsyz paıdalanylýyna jol bermeý týraly eskertý mańyzdy ekeni atap ótildi.
Buǵan deıin «Bir beldeý, bir jol» bastamasy aıasyndaǵy Qytaı ınvestıtsııalary rekordtyq deńgeıge jetkeni belgili boldy. Al Qazaqstan — Qytaı ınvestıtsııalaryn eń kóp tartqan el atandy.