Qytaı strategııalyq mıneraldarǵa baqylaýdy kúsheıtedi

  ASTANA.KAZINFORM - Qytaı bıligi strategııalyq paıdaly qazbalardyń shetelderge zańsyz ótýine jol bermeý úshin baqylaýdy kúsheıtpekshi. Bul týraly Qytaı Halyq Respýblıkasynyń Saýda mınıstrligi málimdedi, dep habarlaıdy Kazinform agenttiginiń tilshisi. 

— Mıneraldy resýrstarǵa strategııalyq baqylaý onyń qaınar kózinen bastalyp, óndirý, balqytý, óńdeý, tasymaldaý, satý jáne eksporttaý sııaqty búkil tizbekti qamtýy kerek, — dep keltiredi Global Times Qytaıdyń Saýda mınıstrligi ókiliniń sózin.

Qytaıdyń sırek kezdesetin mınerdardaryna eksporttyq baqylaýy AQSh qorǵanys ónerkásibine aýyr soqqy bolýy múmkin, dep jazady Global Times.

Buǵan deıin Global Times amerıkalq BAQ-qa silteme jasaı otyryp, Qytaıdyń keıbir ortasha jáne aýyr mıneraldaryna, sonyń ishinde avıonıka úshin mańyzdy resýrstarǵa eksporttyq baqylaýdy engizý týraly sáýirdegi málimdemesi AQSh-tyń altynshy býyn F-47 joıǵysh ushaǵy jobasyna soqqy berýi múmkin ekenin atap ótti.

4 sáýirden bastap Qytaı sırek kezdesetin birneshe metaldyń eksportyna shekteý qoıdy.

Sol kezde Qytaıdyń Saýda mınıstrligi málimdeme jasap, Qytaı úkimeti sırek kezdesetin metaldarǵa eksporttyq baqylaý engizip jatqanyn aıtqan.

Eksporttyq shekteý qoıylatyn sırek metaldar tizimine samarıı, terbıı, skandıı, ıttrıı jáne basqa jeti metal kiredi.

Aıta keteıik, Qytaı joǵary tehnologııalyq qurylǵylardy óndirýde keńinen qoldanylatyn sırek jer metaldaryn álemdegi eń iri jetkizýshilerdiń biri sanalady.

Aıta ketelik Qytaıdaǵy túngi bazarda atys bolyp, eki adam qaza tapqan edi.