Qytaı steıblkoındardyń zertteýin qarjylandyrady

ASTANA. KAZINFORM – Qytaıdyń Ulttyq jaratylystaný ǵylymdary qory steıblkoındar men olardyń transshekaralyq baqylaý júıelerine arnalǵan ǵylymı jobalardyń konkýrstyq irikteýiniń bastalǵanyn jarııalady, dep habarlaıdy South China Morning Post.

Jarııalanǵan aqparatqa sáıkes, jobalar jahandyq steıblkoındarmen baılanysty táýekelderdi zertteýge jáne tsıfrlyq qarjylardy halyqaralyq deńgeıde retteý isin jetildirý boıynsha usynystar ázirleýge baǵyttalýy tıis.

Valıýta turaqtylyǵy men tıimdi monıtorıng júıelerin qurý máselelerine erekshe nazar aýdarylady, óıtkeni jeke tsıfrlyq aktıvterdiń jasyryn aınalymy ulttyq qarjy júıelerine qysym kórsetýi múmkin.

Resmı habarlamada Qytaıdyń eki jaqty synaqqa tap bolǵany atap ótilgen. Bir jaǵynan jeke steıblkoınderdiń aınalymy valıýtalyq baqylaýdyń tıimdiligine nuqsan keltirýi múmkin, ekinshi jaǵynan dollarlyq steıblkoınderdiń ósip kele jatqan jahandyq ekspansııasy ıýannyń ınternatsıonaldandyrylýy úshin qıyndyqtar týdyrady.

Qor jobalardy júzege asyrý úshin 200 myńnan 300 myń ıýanǵa deıin (28-42 myń AQSh dollar) granttar bóledi. Ótinim berý merzimi 9 qazan, al bekitilgen zertteýler on-on eki aı ishinde aıaqtalady dep kútilip otyr.

Qytaı halyqaralyq retteý tájirıbesin muqııat qadaǵalaı otyryp, óziniń ulttyq tsıfrlyq valıýtasy – e-CNY-di turaqty túrde ilgeriletip otyr. AQSh pen Gonkongtaǵy sońǵy bastamalardyń aıasynda Qytaıdaǵy ǵalymdar men ınvestorlar esepteýler, jetkizý tizbegin qarjylandyrý jáne tsıfrlyq aktıvterde ınnovatsııalardy yntalandyrýǵa kómektesetin ıýanmen qamtamasyz etilgen steıblkoınder shyǵarý múmkindigin talqylap jatyr.

Buǵan deıin Qytaı alǵashqy ıýanǵa baılanǵan steıblkoındy iske qosýdy qarastyryp otyrǵanyn jazǵan bolatynbyz.