Qytaı spýtnıktik ınterneti Qazaqstanda qashan iske qosylady
ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi bıyl Qytaıdyń Shanghai Spacecom Satellite spýtnıktik kompanııasymen memorandýmǵa qol qoıýdy josparlap otyr, dep habarlaıdy Kazinform tilshisi.
– Bizdiń mindetimiz – baılanys naryǵynda básekege qabiletti jaǵdaı jasaý. Bul ınternettiń sapasyn jáne qamtý aımaǵyn jaqsartatyn negizgi baǵyttardyń biri dep sanaımyz. Qazir naqty kelissózder júrgizýdemiz, biraq áli memorandýmǵa qol qoıylǵan joq. Qytaıdyń (Shanghai Spacecom Satellite – red.) kompanııalarynyń biri munda stantsııa qurýǵa jáne bizdiń sharttarǵa kelisýge daıyn ekenin bildirdi. Negizinen olar osy jerde damýdy qalaıdy. Bıyl 2025 jyly olarmen memorandýmǵa qol qoıyp, merzimderdi naqtylaýdy josparlap otyrmyz. Qazir eshteńe belgisiz. Biraq túsinikti bolýy úshin aıta keteıin, osy jáne basqa da qytaılyq kompanııalar elge kelýge nıet tanytyp otyr. Olar qazir spýtnıktik stantsııalardy iske qosý satysynda tur, – dedi Tsıfrlyq damý, ınnovatsııalar jáne aeroǵarysh ónerkásibi mınıstrliginiń Telekommýnıkatsııa komıtetiniń tóraǵasy Damır Seısembekov «Astana habta» ótken strategııalyq talqylaýda.
Sonymen qatar, onyń aıtýynsha, Starlink (3000 spýtnık) jáne OneWeb (340 spýtnık) sııaqty iri oıynshylarmen salystyrǵanda, qytaılyq kompanııa ázirge az mólsherde spýtnık qosýda. Búginde olar 18 spýtnık ornalastyrdy jáne 2025 jyldyń qańtarynda taǵy 18 spýtnık ushyrýdy josparlap otyr.
D.Seısembekov qazaqstandyq mınıstrliktiń sheteldik kompanııalarmen birneshe memorandýmǵa qol qoıǵanyn da atap ótti. Atap aıtqanda, OneWeb kompanııasymen memorandým jasalǵan, bul kompanııa bıyl kommertsııalyq qyzmetterdi usyna bastaıdy.
Sondaı-aq, ótken jyly Amazon Kuiper kompanııasymen memorandýmǵa qol qoıyldy, olar Qazaqstanda 2025 jyldyń sońyna qaraı jumysyn bastaýdy josparlap otyr.
Aıta keteıik, Astana Hub alańynda Tsıfrlyq damý, ınnovatsııalar jáne aeroǵarysh ónerkásibi mınıstrligi uıymdastyrǵan «Telekommýnıkatsııalar týraly» zań jobasyn ázirleý týraly strategııalyq sessııa ótti.
Buǵan deıin Qýanyshbek Esekeev sheteldik iri spýtnık operatorlaryn Qazaqstanda lokalızatsııalaýdyń mańyzdylyǵy týraly aıtqan edi.