Qytaı spýtnıkterdiń jańa tobyn ǵaryshqa ushyrdy
ASTANA. KAZINFORM — Qytaı jeksenbi kúni eldiń soltústik-batysyndaǵy «Dýnfen» kommertsııalyq ǵarysh ushyrýlaryna arnalǵan ınnovatsııalyq-eksperımenttik aımaqtan «Lıtszıan-1 Y18» zymyran-tasyǵyshyn sátti ushyrdy, dep habarlaıdy Sınhýa.
Zymyran-tasyǵysh Beıjiń ýaqytymen saǵat 12:03–te ushyp, 9 spýtnıkti belgilengen orbıtalaryna shyǵardy. Bul spýtnıkter ǵarysh keńistigin baqylaýǵa, tabıǵı apattardyń aldyn alýǵa jáne olardyń saldaryn azaıtýǵa, sondaı-aq ǵylymı tájirıbeler júrgizýge arnalǵan.
Mıssııa sátti aıaqtaldy.
Bul — Qytaı Ǵylym akademııasynyń Mehanıka ınstıtýty qurǵan CAS Space kommertsııalyq kompanııasy ázirlegen «Lıtszıan» serııaly zymyran-tasyǵyshtardyń 17-inshi ushyrylymy.
Búginge deıin «Lıtszıan» serııaly zymyran-tasyǵyshtar bir ǵarysh kemesi men 121 spýtnıkti orbıtaǵa shyǵardy. Olardyń orbıtaǵa jetkizgen paıdaly júktemesiniń jalpy salmaǵy 21 tonnadan asty.
Eske salaıyq, Qytaı Jer men Aı arasynda halyqaralyq spýtnıktik jeli qurady.
