Qytaı SІM Sı Tszınpın, Pýtın jáne Tramptyń 19 qarashada kezdesetinin rastady
ASTANA. KAZINFORM — QHR Syrtqy ister mınıstrligi dúısenbi kúni ATES sammıti aıasynda Qytaı, Reseı jáne AQSh basshylarynyń úshjaqty kezdesý ótkizetinin rastady, dep habarlaıdy Kazinform agenttiginiń Beıjińdegi menshikti tilshisi.
– 19 qarashada QHR tóraǵasy Sı Tszınpın Shenchjen qalasynda Reseı prezıdenti Vladımır Pýtın jáne AQSh prezıdenti Donald Tramppen úshjaqty kezdesý ótkizedi, – delingen Qytaı Syrtqy ister mınıstrliginiń resmı habarlamasynda.
Qytaı Syrtqy ister mınıstrliginiń resmı ókili Mao Nın ótken jumada jýrnalısterge arnalǵan brıfıngide Qytaı tarapy úshjaqty kezdesýge daıyndyq máselesi boıynsha tıisti taraptarmen baılanys ornatyp otyrǵanyn málimdedi.
Onyń sózinshe, Qytaı bıyl 12 jylda alǵash ret ATES sammıtin qabyldap otyr. Forýmǵa tóraǵalyq etý kezeńinde Qytaı tarapy 300-den astam túrli jıyn men is-shara uıymdastyrdy.
– Biz forýmǵa qatysýshy taraptar ortaq ustanymdy nyǵaıtyp, Shenchjen deklaratsııasyn qabyldap, saýda, ózara baılanys, tsıfrlyq ekonomıka jáne jasandy ıntellekt sııaqty mańyzdy salalarda naqty nátıjelerge qol jetkizedi dep úmittenemiz. Bul Azııa-Tynyq muhıty aımaǵy men búkil álemniń órkendeýi men ósimine qýatty serpin beredi, – dedi ol.
Buǵan deıin Pýtın, Sı Tszınpın jáne Tramptyń úshjaqty kezdesýi 19 qarashada Qytaıda ótetini habarlanǵan bolatyn.