Qytaı SІM: Chehııa Prezıdentimen baılanysta bolmaımyz

ASTANA. KAZINFORM — Qytaı Syrtqy ister mınıstrliginiń resmı ókili Lın Tszıan 12 tamyzda ótken baspasóz maslıhatynda el úkimetiniń Chehııa Prezıdenti Petr Pavelmen endigári baılanysta bolmaıtynyn málimdedi. Bul týraly Qytaı SІM-niń resmı saıty habarlady. 

Brıfıngte «China Daily» basylymynyń tilshisi resmı ókilden «Jýyrda Chehııa Prezıdenti Pavel Japonııadaǵy saparyn aıaqtaǵannan keıin Úndistanǵa soǵyp, XIV Dalaı-lamamen kezdesken. Qytaı tarapy buǵan qalaı jaýap qaıtarady?» dep surady. 

— Qytaı tarapynyń birneshe márte narazylyq bildirip, eskertý jasaýyna qaramastan, Chehııa Prezıdenti Petr Pavel alǵan betinen qaıtpaı, Úndistanda Dalaı-lamamen kezdesti. Bul — Chehııa úkimetiniń Qytaı úkimetine bergen saıası ýádesine óreskel qaıshy ári Qytaıdyń egemendigi men aýmaqtyq tutastyǵyna nuqsan keltirgendik. Qytaı tarapy buǵan qatty narazy ekenin jáne batyl qarsylyq bildiretinin aıtyp, cheh tarapyna qatań málimdeme usyndy. Paveldiń arandatýshylyq áreketine baılanysty, Qytaı tarapy onymen eshqandaı baılanysta bolmaýǵa sheshim qabyldady, — dedi Lın Tszıan. 

DW agenttiginiń jazýynsha, 27 shilde kúni Chehııa Prezıdenti Petr Pavel jeke saparmen Úndistanǵa barǵan ári Tıbettiń emıgratsııadaǵy rýhanı kósemi Dalaı-lamamen júzdesip, ony 90 jasqa tolýymen quttyqtaǵan.

Eske sala keteıik, Qytaı 12 tamyzdan bastap AQSh-tan ımporttalatyn taýarlarǵa qosymsha 24 paıyzdyq baj salyǵyn toqtata turýdy 90 kúnge uzartý týraly sheshim qabyldady.